মূল্যবৃদ্ধিৰ মাধমাৰ! আজিৰে পৰা সমগ্ৰ অসমতে দাম বাঢ়িল ব্ৰেডৰ; ৩ টকাৰ পৰা ৫ টকালৈ পালে বৃদ্ধি
আজিৰে পৰা সমগ্ৰ অসমতে বৃদ্ধি পাইছে ব্ৰেডৰ দাম। পশ্চিম এছিয়াত যুদ্ধৰ পৰিস্থিতিত বৃদ্ধি পোৱা ইন্ধনৰ মূল্য আৰু যোগানৰ সমস্যাই দৈনন্দিন অত্যাৱশ্যকীয় সামগ্ৰী অধিক ব্যয়বহুল কৰি তুলিছে। নিৰ্বাচনকেন্দ্ৰিক পৰিস্থিতিত সামগ্ৰীৰ দাম নিয়ন্ত্ৰণত ৰখাৰ পিছত এইবাৰ হোৰাহোৰে দাম বৃদ্ধি পাবলৈ লৈছে।
শেহতীয়াকৈ মূল্যবৃদ্ধিয়ে প্ৰভাৱিত কৰা সামগ্ৰীসমূহৰ লগতে এইবাৰ ব্ৰেডৰ দাম বৃদ্ধি পোৱাৰ ফলত সাধাৰণ গ্ৰাহকৰ ওপৰত মূল্যবৃ্দ্ধিৰ বোজা ভালকৈয়ে অনুভুত হ’ব। আকাৰ আৰু ব্ৰেণ্ডৰ ওপৰত নিৰ্ভৰ কৰি ৩ টকাৰ পৰা ৫ টকাৰ ভিতৰত বৃদ্ধি পাইছে ব্ৰেডৰ দাম।
সংশোধিত হাৰ অনুসৰি পূৰ্বে ৩৫ টকাৰ ব্ৰেডৰ দাম এতিয়া ৪০ টকা হ’ব, আনহাতে ৪০ টকাত বিক্ৰী হোৱা ব্ৰেডৰ দাম ৪৫ টকালৈ বৃদ্ধি পাইছে। ইতিমধ্যে পেকেজিঙত নতুন মূল্য আপডেট কৰা হৈছে।
সেইদৰে, কণীৰ দামো বৃদ্ধি পাইছে। কণীৰ প্লেটৰ দাম ১০ টকা বৃদ্ধি পাই ২০০ টকাৰ পৰা ২১০ টকা হৈছে। গাখীৰ আৰু দুগ্ধজাত সামগ্ৰীৰ লগতে শাক-পাচলি আৰু বিস্কুটৰ মূল্যও যোৱা কিছুদিনত বৃদ্ধি পাইছে।
ইতিমধ্যে চাউল ৫ টকাৰ পৰা ১০ টকা, সৰিয়হৰ তেল ১০ টকা, আৰু মছুৰ দালিৰ দৰে দালি প্ৰায় ১০ টকা ব্যয়বহুল হৈ পৰিছে। পিঁয়াজৰ দাম ১০ টকা বৃদ্ধি পোৱাৰ বিপৰীতে মুগ দালিৰ মূল্য প্ৰায় ২০ টকাকৈ বৃদ্ধি পাইছে।
পশ্চিম এছিয়াৰ সংঘাতৰ প্ৰভাৱ অসমৰ স্থানীয় বজাৰত ক্ৰমান্বয়ে অনুভৱ হোৱাৰ সময়তে এই বৃদ্ধিৰ খৱৰ আহিছে। বৃদ্ধি পোৱা ইন্ধনৰ মূল্য আৰু যোগানৰ চাপে সমগ্ৰ ৰাজ্যতে অত্যাৱশ্যকীয় সামগ্ৰীৰ ব্যয় বৃদ্ধি কৰিছে।
বজাৰৰ সূত্ৰসমূহৰ মতে, এই মূল্যবদ্ধিৰ আঁৰৰ প্ৰধান কাৰণ হৈছে ইন্ধনৰ ব্যয় বৃদ্ধি, যাৰ ফলত পৰিবহণ ব্যয় বৃদ্ধি পাইছে। পশ্চিম এছিয়াত চলি থকা উত্তেজনাই বিশ্বৰ তেলৰ মূল্য অস্থিৰ কৰি ৰখাৰ ফলত ইন্ধনৰ হাৰ আৰু যোগান শৃংখলত প্ৰত্যক্ষ প্ৰভাৱ পৰিছে।
কিন্তু শেহতীয়া মূল্যবৃদ্ধিয়ে সাধাৰণ জনতাৰ দৈনন্দিন জীৱনত যে ভীষণ প্ৰভাৱ পেলাব তাত সন্দেহ নাই।