বিবাহস্থলীৰ দৃশ্য! স্বয়ংক্ৰিয় ৰাইফল লৈ দৰা-কইনা
নাগা সশস্ত্ৰ বিদ্ৰোহী এন এছ চি এনৰ এটা গোট এন এছ চি এন য়ুনাইটেডৰ দুজন জ্যেষ্ঠ মন্ত্ৰীৰ পুতেক আৰু জীয়েকৰ মাজত অনুষ্ঠিত এখন বিয়াত দেখা গ’ল অতি ব্যতিক্ৰম দৃশ্য।
সংগীতৰ “গান”ৰ পৰিৱৰ্তে ইংৰাজী “গান” অৰ্থাৎ হাতত স্বয়ংক্ৰিয় ৰাইফল লৈ বিবাহস্থলীত বিভিন্ন প’জ দিলে বিবাহপাশত আবদ্ধ হোৱা দৰা-কইনা উভয়ে।
বিবাহস্থলীৰ এই দৃশ্যটোৰ কিছুমান ফটো ৰাজহুৱা হোৱা এই ঘটনাটো ৯ নৱেম্বৰৰ আৰু ঘটনাস্থল আছিল ডিমাপুৰৰ পাঁচ মাইলৰ।
জানিব পৰামতে দৰা আৰু কইনাৰ দেউতাক দুজন এন এছ চি এন (য়ুনাইটেড)ৰ শীৰ্ষ নেতা।
এই গোটটোৰ ডেজিগনেটেড কেম্পৰ আন এটা ভিডিঅ’ও কিছুদিন পূৰ্বে ভাইৰেল হৈছিল, য’ত এজন নেতাই কেডাৰক নাগামিজত সম্বোধন কৰি থকা দেখা গৈছিল।
উক্ত ভিডিঅ’টোত নেতাজনে সদস্যসকলক ধৈৰ্য্য ধৰিবলৈ পৰামৰ্শ দি দুই-এদিনতে হ’ব লগীয়া নাগা শান্তিচুক্তিৰ বাবে বাট চাবলৈ আহ্বান জনাইছিল। যিসকল কেডাৰে শিবিৰ এৰি পলাই গৈছিল তেওঁলোকক গৰিহণা দিয়া হৈছিল।
এই একত্ৰিকৰণ গোটটো এন এছ চি এন (আই এম) আৰু এন এছ চি এন (কে) দুয়োটা গোটৰ কিছু সংখ্যক কেডাৰ আৰু নেতাৰে ২০০৭ চনত গঠিত হৈছিল. উদ্দেশ্য আছিল দুয়োটা গোটৰ মাজত থকা বিৰোধ আৰু তিক্ততা নোহোৱা কৰি এটা কৰা।