নিৰাপত্তাবাহিনীৰ গুলীত গুৰুতৰভাৱে আহত ১০জন প্ৰতিবাদকাৰী, এজনৰ মৃত্যু হোৱা আশংকা

সংখ্যাৰ বলত বিজেপি নেতৃত্বাধীন কেন্দ্ৰীয় চৰকাৰে বুধবাৰে নিশা ৰাজ্যসভাত নাগৰিকত্ব সংশোধনী বিধেয়ক গৃহীত কৰাক লৈ ক্ৰমাৎ উত্তপ্ত হৈ পৰিছে গুৱাহাটীৰ পৰিৱেশ।

কেব বিৰোধী জনতাই স্বতঃস্ফুৰ্তভাৱে ৰাজপথলৈ ওলাই আহি প্ৰতিবাদ সাব্যস্ত কৰাৰ সময়তে প্ৰতিবাদকাৰীক চত্ৰভংগ দিয়াবৰ বাবে আৰক্ষীয়ে নিৰ্বিচাৰভাৱে গুলীচালনা কৰাৰ খবৰ আহিছে।

তেনে এক ঘটনা সংঘটিত হৈছে গুৱাহাটীৰ লালুংগাঁৱত। সান্ধ্য আইন আৰু ১৪৪ ধাৰা লাগু হৈ থকাৰ পিছতো বিধেয়ক বাতিলৰ দাবীত শ-শ জনতা ৰাজপথলৈ ওলাই অহাত আৰক্ষী প্ৰশাসনে ধাৰাসাৰ গুলীচালনা কৰে।

আৰক্ষীৰ গুলীত দহগৰাকী প্ৰতিবাদকাৰী আঘাতপ্ৰাপ্ত হৈছে। জানিব পৰা মতে ইয়াৰে এজন প্ৰতিবাদকাৰীৰ মৃত্যু হোৱা বুলি আশংকা প্ৰকাশ কৰা হৈছে। কিন্তু এতিয়ালৈ চৰকাৰীভাৱে এই খবৰৰ কোনো সত্য সত্যতা প্ৰকাশ কৰা নাই।

আঘাতপ্ৰাপ্ত লোকসকলক বৰাগাঁওস্থিত এক্সেল কেয়াৰ আৰু আয়ুৰচুন্দ্ৰা হস্পিতালত ভৰ্তি কৰোৱা হৈছে যদিও এতিয়াও পৰিচয় জানিব পৰা হোৱা নাই।

উন্মত্ত জনতাৰ প্ৰতিবাদ ৰোধ কৰাৰ বাবে সমগ্ৰ মহানগৰীতে সেনা মোতায়েন কৰা হৈছে।