পেকেজিঙত মৰাপাটৰ বাধ্যতামূলক ব্যৱহাৰৰ বাবে সংৰক্ষণ প্ৰক্ৰিয়াত অনুমোদন কেন্দ্ৰীয় কেবিনেটৰ

কেন্দ্ৰীয় কেবিনেটে বুধবাৰে মৰাপাট বৰ্ষ ২০২১-২২ ৰ প্ৰতি লক্ষ্য ৰাখি পেকেজিঙত মৰাপাটৰ বাধ্যতামূলক ব্যৱহাৰৰ বাবে সংৰক্ষণ প্ৰক্ৰিয়াত অনুমোদন জনাইছে।

পেকেজিঙৰ নতুন নিয়ম অনুসৰি মৰাপাটৰ মোনাত খাদ্যশস্য পেক কৰাৰ বাবে ১০০ শতাংশ আৰু চেনীৰ বাবে ২০ শতাংশ সংৰক্ষণৰ ব্যৱস্থা কৰে।

“বৰ্তমানৰ প্ৰস্তাৱিত সংৰক্ষণৰ নিয়মবোৰে দেশত কেঁচা মৰাপাট আৰু মৰাপাট পেকেজিং সামগ্ৰীৰ ঘৰুৱা উৎপাদনৰ স্বাৰ্থ অধিক সুৰক্ষিত কৰিব, যাৰ ফলত ভাৰতে ‘আত্মনিৰ্ভৰ ভাৰত’ৰ সৈতে সামঞ্জস্য ৰাখি আত্মনিৰ্ভৰশীল হ’ব।”— চৰকাৰৰ এক বিজ্ঞপ্তিত কোৱা হৈছে।

ভাৰত চৰকাৰে খাদ্যশস্য পেকিং কৰাৰ বাবে প্ৰতি বছৰে প্ৰায় 8,000 কোটি টকাৰ মৰাপাটৰ মোনা ক্ৰয় কৰে, যাৰ ফলত মৰাপাট খেতিয়ক আৰু শ্ৰমিকৰ উৎপাদনৰ বাবে নিশ্চিত বজাৰ নিশ্চিত হয়। মৰাপাট পেকেজিং সামগ্ৰীত পেকেজিঙৰ বাবে সংৰক্ষণে ২০২০-২১ বৰ্ষত দেশত উৎপাদিত কেঁচা মৰাপাটৰ প্ৰায় ৬৬.৫৭ শতাংশ ব্যৱহাৰ কৰাত সহায় কৰিছিল বুলি বিবৃতিটোত কোৱা হৈছে।

কেন্দ্ৰই কয় যে শেহতীয়া সিদ্ধান্তই মৰাপাট কল আৰু আনুষঙ্গিক কৰ্মত নিয়োজিত ০.৩৭ নিযুত শ্ৰমিকক সকাহ প্ৰদান কৰাৰ লগতে প্ৰায় ৪ নিযুত খেতিয়ক পৰিয়ালৰ জীৱিকাত সহায় কৰিব।

মৰাপাট উদ্যোগৰ মুঠ উৎপাদনৰ প্ৰায় ৭৫ শতাংশ হৈছে মৰাপাট নিৰ্মিত মোনা, যাৰ ৯০ শতাংশ ভাৰতীয় খাদ্য নিগম আৰু ৰাজ্যিক ক্ৰয় সংস্থাক যোগান ধৰা হয়। আনহাতে বাকী অংশ পোনপটীয়াকৈ ৰপ্তানি বা বিক্ৰী কৰা হয়।

বিবৃতিটোত লগতে কোৱা হৈছে, “মৰাপাট মোনাৰ গড় উৎপাদন হৈছে প্ৰায় ৯ লাখ মেট্ৰিক টন আৰু মৰাপাট নিৰ্মিত মোনাৰ সম্পূৰ্ণ ব্যৱহাৰ নিশ্চিত কৰিবলৈ চৰকাৰ প্ৰতিশ্ৰুতিবদ্ধ যাতে মৰাপাট খেতিয়ক, শ্ৰমিক আৰু মৰাপাট উদ্যোগত নিয়োজিত ব্যক্তিসকলৰ স্বাৰ্থ সুৰক্ষিত হয়।”

ইফালে কেবিনেটে ২০১৪-১৫ বৰ্ষৰ পৰা ২০২০-২১ বৰ্ষলৈ কপাহৰ উৎপাদনৰ বাবে ভাৰতীয় কপাহ আয়োগক ১৭,৪০৮.৮৫ কোটি টকাৰ প্ৰতিশ্ৰুতিবদ্ধ মূল্য সমৰ্থনৰ বাবেও অনুমোদন জনাইছে। মূল্য সমৰ্থন কাৰ্যই কপাহৰ দৰ স্থিৰ কৰাত সহায় কৰিব।