এনেদৰে প্ৰায় ২৪ টকাত বজাৰত উপলব্ধ হ’ব প্ৰতি কিলোগ্ৰাম পিঁয়াজ
কেন্দ্ৰ চৰকাৰৰ তৰফৰ পৰা ৰাজ্য চৰকাৰক প্ৰতি কিলোগ্ৰাম পিঁয়াজ ১৫.৬৯ টকাত যোগান ধৰিব বুলি বুধবাৰে কেন্দ্ৰীয় উপভোক্তা আৰু ৰাজহুৱা বিতৰণ মন্ত্ৰী ৰাম বিলাস পাছোৱানে ঘোষণা কৰে।
বিগত সময়ছোৱাত মহাৰাষ্ট্ৰ আৰু মধ্যপ্ৰদেশত হোৱা প্ৰবল বানপানীৰ বাবে পিঁয়াজৰ উৎপাদনত প্ৰভাৱ পৰিছে বুলিও কেন্দ্ৰীয় মন্ত্ৰী গৰাকীয়ে কয়।
আনহাতে, বানপানীৰ বাবে পিঁয়াজৰ যোগান ব্যাহত হ’লেও কেন্দ্ৰীয় চৰকাৰৰ ভড়াঁলত এতিয়াও যথেষ্ট পৰিমাণৰ পিঁয়াজ মজুত আছে বুলি পাছোৱানে কয়। প্ৰায় ৩৫,০০০ টন পিয়াজ এতিয়াও ৰাজহুৱা বিতৰণৰ বাবে কেন্দ্ৰীয় চৰকাৰৰ ভড়াঁলত আছে বুলি তেওঁ জানিবলৈ দিয়ে।
উল্লেখযোগ্য যে, বৰ্তমান দিল্লীৰ খুচুৰা বজাৰত প্ৰতি কিলোগ্ৰাম পিঁয়াজ ৫০ৰ পৰা ৬০টকা দৰত বিক্ৰী হৈ আছে। চৰকাৰে পিঁয়াজৰ বৰ্ধিত মূল্য যিকোনো ধৰণে নিয়ন্ত্ৰণ কৰাৰ বাবে প্ৰচেষ্টা অব্যাহত ৰাখিছে।
তদুপৰি, কেন্দ্ৰীয় চৰকাৰে নেফেডৰ ষ্টকৰ পৰা খুচুৰা বজাৰত পিঁয়াজৰ বিক্ৰী বৃদ্ধি কৰিছে। মংগলবাৰে পাছোৱানে বিভিন্ন ঠাইত ২৪ টকাত পিঁয়াজ উপলব্ধ কৰোৱাৰ ব্যৱস্থা কৰিছে।
পাছোৱানে ৰাজ্য চৰকাৰ সমূহক কেন্দ্ৰ চৰকাৰৰ হাতত উপলব্ধ থকা ৩৫,০০০ টন পিঁয়াজ ব্যৱহাৰ কৰাৰ বাবে আহ্বান জনাইছে যাতে পিঁয়াজৰ বৰ্দ্ধিত মূল্য নিয়ন্ত্ৰণ কৰিব পৰা যায়।
এইক্ষেত্ৰত কেন্দ্ৰীয় চৰকাৰৰ তৰফৰ পৰা ৰাজ্য চৰকাৰ সমূহক নিজৰ নিজৰ ৰাজ্যত পিঁয়াজৰ প্ৰয়োজনীয়তাৰ বিষয়ে জনোৱাৰ বাবে আহ্বান জনাইছে।
দিল্লী, অন্ধ্ৰপ্ৰদেশ, ত্ৰিপুৰা, ওড়িশা আৰু হাৰিয়ানাই বৰ্তমানলৈ কেন্দ্ৰ চৰকাৰক পিঁয়াজৰ যোগান ধৰাৰ বাবে আহ্বান জনাইছে বুলি পাছোৱানে জানিবলৈ দিয়ে।
কেন্দ্ৰীয় চৰকাৰৰ ওচৰত উপলব্ধ থকা পিঁয়াজ ব্যৱহাৰ কৰি প্ৰতি কিলোগ্ৰাম পিঁয়াজৰ মূল্য ২৪ টকালৈ হ্ৰাস কৰিবলৈ সক্ষম হ’ব বুলি ধাৰণ কৰা হৈছে।
উল্লেখযোগ্য যে, কৰ্ণাটকৰ পৰা বজাৰত সময়তকৈ পূৰ্বে পিঁয়াজ আহিবলৈ আৰম্ভ কৰিছে বুলি উল্লেখ কৰি এই ক্ষেত্ৰত মহাৰাষ্ট্ৰৰ ওপৰত থকা চাপ হ্ৰাস পাব আৰু কিছু দিনৰ ভিতৰতে পিঁয়াজৰ মূল্য স্বাভাৱিকভাৱে নিয়ন্ত্ৰণলৈ আহিব বুলি কেন্দ্ৰীয় মন্ত্ৰী গৰাকীয়ে মত প্ৰকাশ কৰে।