ক’ৰ’নাৰ আতংক; বাতিল হ’ব নেকি টকিঅ’ অলিম্পিক! আজি অনুষ্ঠিত হৈছে অলিম্পিক কমিটিৰ উচ্চস্তৰীয় বৈঠক

সমগ্ৰ বিশ্বতে ক’ৰ’না ভাইৰাছে আতংকময় পৰিৱেশ সূচনাৰ কৰা পাছত চিন্তিত হৈ পৰিছে আন্তজাৰ্তিক অলিম্পিক কমিটি(IOC)।

অলিম্পিক কমিটিয়ে আজি অনুষ্ঠিত কৰিছে এখন গুৰুত্বপূৰ্ণ বৈঠক।

উল্লেখ্য যে ২০২০ বৰ্ষৰ অলিম্পিক জাপানৰ টকিঅ’ত অনুষ্ঠিত হোৱাৰ কথা।

সমগ্ৰ বিশ্বৰ লগতে জাপানতো ক’ৰ’না ভাইৰাছে আতংকৰ সৃষ্টি কৰিছে। আৰু এনে আতংকময় পৰিস্থিতিত জাপানৰ কিছুমান প্রতিষ্ঠানে টকিঅ’ অলিম্পিক আয়োজনৰ মৰসাহ কৰিব খোজা নাই বুলি সংবাদ মাধ্যমত প্ৰকাশ পাইছে।

তাৰ পিছতে সজাগ হৈছে অলিম্পিক কমিটি। সেয়ে আজি অলিম্পিক কমিটিৰ উচ্চ স্তৰীয় বৈঠক আহ্বান কৰা হৈছে।

ইতিমধ্যে বিশ্ব স্বাস্থ্য সংস্থা(WHO)ই ইউৰোপক ক’ৰ’নাৰ ভাইৰাছৰ অভিকেন্দ্ৰৰূপে অভিহিত কৰাৰ পিছত বিশ্ব অলিম্পিক সন্থা এই ক্ষেত্ৰত অধিক সতৰ্কতা অৱলম্বন কৰা দেখা গৈছে।

বিশ্ব অলিম্পিক সন্থাই ‘ইনফৰ্মেশ্যন এক্সেঞ্চ’ জৰিয়তে বিশ্বৰ বিভিন্ন ক্ৰীড়া সন্থাৰ লগতো কিদৰে অলিম্পিকৰ আয়োজনৰ প্ৰস্তুতি চলাব পাৰি সেই বিষয়ে আলোচনা কৰিব। IOCৰ সহযোগী সংস্থা আৰু ইয়াৰ অধীনস্থ সংস্থাবোৰৰ সৈতেও এই সন্দৰ্ভত আলোচনা কৰা হ’ব।

ইফালে প্ৰশ্ন উদয় হৈছে বাতিল হ’ব পাৰে নেকি টকিঅ’ অলিম্পিক!

এই ক্ষেত্ৰত IOCয়ে দৃঢ়তাৰে কয় যে নিৰ্ধাৰিত সময়সূচী মতেই টকিঅ’ অলিম্পিক অনুষ্ঠিত হ’ব। ১৬ মাৰ্চত IOCএ আৰু কয় যে টকিঅ’ অলিম্পিক সময়মতে অনুষ্ঠিত কৰিবলৈ IOC দায়ৱদ্ধ আৰু আত্মবিশ্বাসী। কিন্তু এই ক্ষেত্ৰত সংশ্লিষ্ট সকলো পক্ষই IOCক সহযোগিতা আগবঢ়াব লাগিব।

উল্লেখ্য ২৪ জুনৰ পৰা আৰম্ভ হ’বলগীয়া বিশ্বৰ মেগা ইভেন্টখনলৈ মাত্ৰ আৰু ১৯ সপ্তাহে আছে। ইতিমধ্যে বক্সিঙকে আদি কৰি কিছুমান ইভেন্টৰ কেইবাটাও জ’নৰ এথলিটে টকিঅ’ অলিম্পিকলৈ যোগ্যতা অৰ্জন কৰিছে।

ইফালে জাপানৰ চৰকাৰী সূত্ৰত প্ৰকাশ পাইছে যে জাপানৰ প্ৰধাম মন্ত্ৰী ছিনজ’ আবে আৰু বিশ্ব অলিম্পিক কমিটিৰ মুখ্য কাৰ্যবাহী থ’মাছ বাচে নিৰ্ধাৰিত সূচীমতে টকিঅ’ অলিম্পিক অনুষ্ঠিত কৰিবলৈ সঘনে যোগাযোগ ৰক্ষা কৰি চলিছে।

আমেৰিকাৰ ৰাষ্ট্ৰপতি ডোনাল্ড ট্ৰাম্পে টকিঅ’ অলিম্পিক অনুষ্ঠিত কৰিবলৈ পৰামৰ্শ দিছে।

জাপানত এতিয়ালৈকে ৮১৪ জন লোক ক’ৰ’না ভাইৰাছৰ দ্বাৰা আক্ৰান্ত হোৱাৰ বিপৰীতে ২৪ জন আক্ৰান্ত লোকৰ ইতিমধ্যে মৃত্যু ঘটিছে।