এইবাৰ চোৰাং গৰু সৰবৰাহত ব্যৱহাৰ ডাক কঢ়িয়াই নিয়া বাহন

গো-সুৰক্ষা আইনক ভেঙুচালি কৰি ৰাজ্যত অব্যাহত আছে গৰুৰ চোৰাং বেহা।

ডাক কঢ়িয়াই নিয়া বাহনত উদ্ধাৰ হৈছে চোৰাং গৰু। 

আৰক্ষীৰ চকুত ধূলিদি ডাক কঢ়িয়াই নিয়া বাহনত দুষ্টচক্ৰই সৰবৰাহ কৰে চোৰাং গৰু।

কলিয়াবৰত অবৈধ ভাবে গৰু সৰবৰাহ কৰা  এনে গাড়ী এখন  দুৰ্ঘটনাগ্ৰস্ত হোৱাৰ পিছতে চোৰাং গৰু ব্যৱসায়ীৰ চতুৰালিৰ খতা পোহৰলৈ আহিছে।

কলিয়াবৰৰ বৰুৱাচুকত পুৱাই সংঘটিত হয় এই দুৰ্ঘটনা।  AS 01 CC 0074  নম্বৰৰ ডাক কঢ়িয়াই নিয়া কণ্টেনাৰ গাড়ীত অবৈধ ভাবে সৰবৰাহ কৰিছিল প্ৰায় অৰ্ধ শতাধিক গৰু।

উজনিৰ পৰা নগাওঁ দিশলৈ আহি থকা অৱস্থাত নিয়ন্ত্ৰণ হেৰুৱাই বিদ্যুৎৰ খুঁটাত খুন্দা মাৰি দুৰ্ঘটনাত পতিত হয় গাড়ীখন।

বহু গোধনৰ মৃত্যুৰ আশংকা কৰা হৈছে। ইতিমধ্যে কলিয়াবৰ থানাৰ আৰক্ষী ঘটনাস্থলীত উপস্থিত হৈ গাড়ীখন উঠোৱাৰ ব্যৱস্থা কৰিছে।

গাড়ীখনৰ চালক, হেণ্ডিমেনে দুৰ্ঘটনা সংঘটিত কৰিয়ে পলায়ন কৰে।

দুর্ঘটনা সংঘটিত হোৱাতহে পোহৰলৈ আহিছে ৰাজ্যত বৰ্তমানেও  অভিনৱ পন্থাৰে অব্যাহত থকা গৰুৰ চোৰাং বেহাৰ কথা।

কিন্তু এতিয়া প্ৰশ্ন হয় চৰকাৰৰ গো-সুৰক্ষা আইন খন কিমান ফলপ্ৰসূ হৈছে? চৰকাৰে নাকী লগাব পাৰিবনে এই দুষ্ট চক্ৰটোক?

নে আইনৰ চকুত ধূলি দি চলি যাব গৰুৰ চোৰাং এই ৰমৰমীয়া বেহা?

চৰকাৰ তথা প্ৰশাসনে অনাগত দিনত কি ব্যৱস্থা গ্ৰহণ কৰিব সেয়া হব লক্ষ্যণীয়।