দিল্লীৰ লকডাউন ১৪ এপ্ৰিলতকৈ বঢ়াই দিয়া হ’ব পাৰে

বৰ্তমানৰ পৰিস্থিতি বাহাল থাকিলে দিল্লীত ১৪ এপ্ৰিলৰ পিছলৈকে লকডাউন বৃদ্ধি কৰা কৰা হ’ব পাৰে।

দিল্লীৰ উপ মুখ্য মন্ত্ৰী মনীষ চিচ’দিয়াই কৰিছে এই মন্তব্য।

অহা এসপ্তাহত দিল্লীৰ পৰিস্থিতি আগতীয়াকৈ পূৰ্বানুমান কৰিবলৈ অস্বীকাৰ কৰি মন্ত্ৰীজনে এই মন্তব্য কৰিছে।

“পৰিস্থিতি যদি বাহাল থাকে লকডাউন বঢ়াই দিয়াৰ এক প্ৰয়োজন থাকিব পাৰে কাৰণ ঘটনাসমূহ বাঢ়ি আছে।…মুখ্য মন্ত্ৰী আৰু প্ৰধান মন্ত্ৰীয়ে সাধাৰণ ৰাইজৰ স্বাৰ্থত যিকোনো সিদ্ধান্ত গ্ৰহণ কৰিব,” চিচ’দিয়াৰ মন্তব্যৰে আপৰ টুইট।

কৰ’নাভাইৰাছৰ সংক্ৰমণ নিয়ন্ত্ৰণৰ বাবে দিল্লীৰ ২৩টা ঠাইত লকডাউন কঠোৰ কৰি দিয়া হৈছে।

ৰাজধানী দিল্লীত এতিয়ালৈকে ৬৬৯ গৰাকী ক’ভিড-১৯ আক্ৰান্ত চিনাক্ত হৈছে। ২১ জন লোকে আৰোগ্য লাভ কৰাৰ বিপৰীতে নজন মৃত্যুমুখত পৰিছে।

ইতিমধ্যেই ভাৰতৰ ভিতৰত প্ৰথম ৰাজ্য হিচাপে ওড়িছা চৰকাৰে ৩০ এপ্ৰিললৈকে লকডাউনৰ সীমা বৃদ্ধি কৰিছে।

ওড়িছাত শিক্ষানুষ্ঠানসমূহ ১৭ জুনলৈকে বন্ধ ঘোষণা কৰা হৈছে। ৰাজ্যখনে ৩০ এপ্ৰিললৈকে ৰেল আৰু বিমান সেৱা মুকলি নকৰিবলৈ কেন্দ্ৰক অনুৰোধ কৰিছে।

তেলেংগানা চৰকাৰেও কেন্দ্ৰক লকডাউন বঢ়াই দিবলৈ অনুৰোধ কৰিছে।

প্ৰধান মন্ত্ৰী নৰেন্দ্ৰ মোদীয়ে অহা ১১ এপ্ৰিলত সকলো ৰাজ্য আৰু কেন্দ্ৰীয় শাসিত অঞ্চলৰ মুখ্য মন্ত্ৰীৰ সৈতে ভিডিঅ’ কনফাৰেন্সিঙত মিলিত হ’ব।

সেই বৈঠকৰ পিছতে ১৪ এপ্ৰিললৈকে থকা দেশজোৰা লকডাউন সন্দৰ্ভত প্ৰধান মন্ত্ৰী এক চূড়ান্ত সিদ্ধান্তলৈ আহিব বুলি ধাৰণা কৰা হৈছে।