কৃষ্ণাইত গাঁতত আৱদ্ধ হাতী পোৱালি উদ্ধাৰ : মাতৃক বিচাৰি পোৱালিটোৰ মৰণকাতৰ চিঞৰ

গোৱালপাৰাত এটা হাতী পোৱালিৰ কৰুণ বিননিয়ে প্ৰত্যক্ষদৰ্শী সকলোকে ব্যথিত কৰি তোলে৷ জাকৰ পৰা বিচ্ছিন্ন হৈ শনিবাৰে নিশা গাঁতত আৱদ্ধ হৈ পৰে হাতী পোৱালিটো। পুৱাই দিকবিদিক হেৰুৱাই মাতৃক বিচাৰি হাতী পোৱালিটোৱে মৰা মৰণকাতৰ চিঞৰত চৌদিশে আতংকময় পৰিৱেশ বিৰাজ কৰে।

ৰাজ্যত ক্ৰমাৎ বৃদ্ধি পাই আহিছে হস্তী মানুহৰ সংঘাত ৷ গোৱালপাৰাৰ বিভিন্ন প্ৰান্ততো হস্তী মানুহৰ সংঘাতে শেহতীয়াকৈ ভয়াৱহ ৰূপ ধাৰণ কৰিছে ৷

শনিবাৰে নিশা জিলাখনৰ ফুটুৰীপাৰা গাঁৱত বনাঞ্চলৰ পৰা খাদ্যৰ সন্ধানত ওলাই অহা বন্যহস্তীৰ জাক এটাই বিচৰণ কৰি থকাৰ সময়তে পৰিত্যক্ত কুঁৱাত এটাত পৰি হাতী পোৱালি এটা আৱদ্ধ হৈ পৰে।

পাছত বন বিভাগে ৰাইজৰ সহায়ত এক্সেভেটৰৰে বহু সময়ৰ প্ৰচেষ্টাৰ অন্তত গাঁতৰ পৰা উদ্ধাৰ কৰে পোৱালিটো ৷ ইফালে নিশাই জাকটো পোৱালিটোক এৰি গাঁৱৰ পৰা বনাঞ্চললৈ গুচি যায় ৷

ইপিনে পুৱা এনেদৰে মাতৃক বিচাৰি দিকবিদিক হেৰুৱাই পোৱালিটো ঘুৰি ফুৰিছে ৷ মাতৃস্নেহৰ পৰা বঞ্চিত হৈ পোৱালিটোৱে মৰণ-কাতৰভাৱে চিঞৰি থাকে। এনে মৰ্মান্তিক দৃশ্যই সকলোকে ব্যথিত কৰি তোলে।

আনহাতে, নিশা গাঁতৰ পৰা উদ্ধাৰ কৰিয়ে যেন দায়িত্ব সামৰিছে গোৱালপাৰাৰ বন বিভাগে ৷ পুৱা এনেদৰে জনাঞ্চলত মাতৃক বিচাৰি পোৱালিটোৱে হাহাকাৰ কৰি থকাৰ পাছতো বন বিভাগৰ কোনো খবৰ নাই ৷ ইয়াৰ বাবে বাবে বন বিভাগৰ বিৰুদ্ধে ৰাইজে ক্ষোভ উজাৰে।