উইকেটৰ পাছত ধোনীৰ সফলতাৰ ৰহস্য ফাদিল কৰিলে ইংলেণ্ডৰ ক্ৰিকেটাৰ মন্টি পানেছাৰে

ভাৰতীয় দলৰ প্ৰাক্তন অধিনায়ক মহেন্দ্ৰ সিং ধোনীৰ বিৰুদ্ধে নিজৰ খেলৰ অভিজ্ঞতা শ্বেয়াৰ কৰিছে ভাৰতীয় মূলৰ ইংলেণ্ডৰ স্পীনাৰ মন্টি পানেছাৰে।

ভাৰতীয় অধিনায়কগৰাকীৰ উইকেটৰ পাছত সফলতাৰ কৌশল সম্পৰ্কেও বৰ্ণনা কৰিছে পানেছাৰে।

শেহতীয়া এক সাক্ষাৎকাৰত পানেছাৰে ধোনীৰ সেই গোপন কৌশলৰ ৰহস্য ফাদিল কৰিছে।

উইকেট কীপাৰৰ দায়িত্বত থকা ধোনীয়ে নিয়মিতভাৱে দলৰ বলাৰসকলক এটা বিশেষ ধৰণে বলিং কৰাৰ বাবে নিৰ্দেশ দিছিল। ইনকামিং ডেলিভাৰী সম্পৰ্কে নিজৰ কোনো ধাৰণা নথকাৰ ভাও ধৰিছিল পানেছাৰে।

সেইদিনসমূহৰ কথা সুঁৱৰি পানেছাৰে কয় যে তেওঁ ধোনীয়ে ষ্টাম্পৰ পাছৰ পৰা স্পীনাৰসকলক দিয়া কিছুমান নিৰ্দেশ লক্ষ্য কৰিছিল।

পানেছাৰে নিজে হিন্দী আৰু পাঞ্জাৱী ভাষা বুজি পাইছিল আৰু বহুখিনি কবও পাৰিছিল।

কিন্তু ধোনীয়ে সেইকথা জনা নাছিল। পানেছাৰে সকলো শুনিও ধোনীৰ দৰেই একো নুশুনাৰ অভিনয় কৰি গৈছিল। এনেদৰে তেওঁ সকলো গম পাই গৈছিল।

পানেছাৰে কয় যে ধোনীয়ে বহুকেইবাৰ এইধৰণে উইকেট লাভ কৰা তেওঁ দেখিছিল। ধোনীৰ বিপক্ষে খেলিবলৈ পাই নিজকে গৌৰৱ অনুভৱ কৰা বুলিও জানিব দিয়ে পানেছাৰে।

স্পীনাৰগৰাকীয়ে ধোনীক আন ক্ৰিকেটাৰ মন বুজাৰ কৃতিত্বও দিছে। লগতে বিপক্ষ দলৰ খেলুৱৈ হিচাপে তেওঁ ধোনীৰ মন বুজি পাবলৈ সক্ষম নহ’ল বুলিও স্বীকাৰ কৰিছে।

পানেছাৰে সদৰী কৰিছে যে ধোনীয়ে আন ক্ৰিকেটাৰসকলক ভালদৰে বুজি পাইছিল যদিও আনে তেওঁক বুজিব পৰা নাছিল। এয়াই ধোনীৰ বিশেষত্ব বুলি তেওঁ কয়।

পানেছাৰে লগতে কয় যে ধোনী যেতিয়া ক্ৰীজত থাকে তেতিয়া তেওঁৰ মন কোনোৱে ধৰিব নোৱাৰে। শেষ তিনি অ’ভাৰৰ প্ৰতি অভাৰত জয়ৰ বাবে ১৫ৰাণকৈ প্ৰয়োজন আৰু সেয়া ধোনীয়ে কৰিব পাৰিছিল।

‘কিন্তু সেয়া কেনেকৈ কৰিলে, সেইটোৱে ধোনীৰ চিক্ৰেট,’-পানেছাৰে কয়।