ন্যায় লাভৰ অপেক্ষাত চিকিৎসকৰ ভুল চিকিৎসাৰ বলি হৈ মৃত্যু হোৱা প্ৰিয়ংকাৰ পৰিয়াল
যোৱা ১৬ মে’ত তৈল নগৰী ডিগবৈৰ এখন ব্যক্তিগত নাৰ্ছিংহোমত চিকিৎসকৰ ভুল চিকিৎসাৰ বলি হৈ এগৰাকী ৰোগীৰ মৃত্যু হোৱাৰ ঘটনাৰ উত্তেজনা এতিয়াও মাৰ যোৱা নাই।
স্মতৰ্ব্য যে, পেটৰ বিষৰ বাবে ডিগবৈৰ সমীপৱৰ্তী বৰডুমছাৰ নিৱাসী ভৱেন দেউৰীৰ পত্নী প্ৰিয়ংকা দেউৰীক ১৫ মে’ত ডিগবৈৰ অসামৰিক চিকিৎসালয়ত ভৰ্তি কৰোৱা হৈছিল।
অসামৰিক চিকিৎসালয়খনৰ প্ৰসূতি বিভাগৰ শুভাশীষ মুৰ্খাজী নামৰ চিকিৎকজনে ৰোগী গৰাকীক অস্ত্ৰোপচাৰ বাবে ডিগবৈস্থিত এম আৰ আগৰৱালা ডায়’গ্নেষ্টিক নাৰ্ছিংহোমত ভৰ্তি কৰোৱাই অস্ত্ৰোপচাৰ কৰে।
কিন্তু ৰোগী গৰাকীৰ শৰীৰত মাত্ৰ পাঁচ শতাংশ হিম’গ্লবিন থকাৰ ফলত অত্যধিক ৰক্তক্ষৰণ হৈ অস্ত্ৰোপচাৰ সম্পন্ন কৰাৰ কিছু সময়ৰ পিছতে ৰোগীগৰাকীৰ মৃত্যু ঘটা বুলি পৰিয়ালৰ লোক অভিযোগ কৰিছে।
ৰোগী গৰাকী পৰিয়ালৰ অভিযোগ মতে চিকিৎসক মুৰ্খাজীৰ ভুল চিকিৎসাৰ বলি হৈ ৰোগী প্ৰিয়ংকা দেউৰীৰ মৃত্যু ঘটিল।
ইফালে ৰোগীৰ পৰিয়াল তথা স্থানীয় লোকৰ অভিযোগ অনুসৰি শুভাশীষ মুখাৰ্জী নামৰ চিকিৎসকজনে উক্ত নাৰ্ছিংহোমখনৰ সৈতে আৰ্থিক লোভৰ বাবে এনে কাণ্ড পূৰ্বৰে পৰা কৰি আহিছে।
ঘটনা সংক্ৰান্তত ১৬ মে’ত অভিযুক্ত চিকিৎকজনৰ বিৰুদ্ধে প্ৰিয়ংকাৰ পৰিয়ালৰ লোকে ডিগবৈৰ আৰক্ষীৰ থানাত গোচৰ ৰুজু কৰে যদিও আৰক্ষীয়ে দুৰ্বল ধাৰা(ভাৰতীয় দণ্ডবিধি ৩০৪-এ) লগাই অভিযুক্ত চিকিৎসকজনৰ পক্ষ লোৱাৰহে অভিযোগ উঠিছে।
আজি কিছুমান স্থানীয় সংগঠনৰ নেতৃত্বৰ সৈতে পৰিয়ালৰ লোকে আৰক্ষী থানালৈ গৈ অভিযুক্ত চিকিৎসক মুখাৰ্জীৰ বিৰুদ্ধে বিহিত ব্যৱস্থা লোৱাৰ অনুৰোধ কৰে যদিও আৰক্ষীয়ে অভিযুক্ত চিকিৎসক গৰাকীক ৰক্ষণা বেক্ষণ দিয়াৰ অভিযোগহে উত্থাপিত হৈছে।
আৰক্ষীৰ তৎপৰতাত অসন্তুষ্ট পৰিয়ালৰ লোকে ন্যায় বিচাৰি আদালতৰ দাৰস্থ হোৱাৰ কথাও প্ৰকাশ কৰিছে।
প্ৰিয়ংকা দেউৰীৰ মৃত্যু সন্দৰ্ভত উত্থাপিত কিছু প্ৰশ্ন—
- শুভাশীষ মুৰ্খাজী নামৰ প্ৰসূতি চিকিৎসকজনে কিয় সামান্য পেটৰ বিষত আক্ৰান্ত ৰোগী গৰাকীক অসামৰিক চিকিৎসালয়তে চিকিৎসা নকৰি আগৰৱালা নামৰ নাৰ্ছিংহোমখন ভৰ্তি কৰোৱাইছিল?
- ৰোগী গৰাকীৰ শৰীৰত মাত্ৰ পাঁচ শতাংশ হিম’গ্লবিন থকাৰ পিছতো কিয় একে দিনাই অস্ত্ৰোপচাৰৰ কৰাৰ সিদ্ধান্ত গ্ৰহণ কৰিছিল? এজন চিকিৎসক হৈও কি তেওঁ কি জনা নাছিল নেকি যে এই পৰিমাণৰ হিম’গ্লবিনত ৰোগীক অস্ত্ৰোপচাৰ কৰাটো বিপদজনক?
- চিকিৎসক মুখাৰ্জীৰ মতে ৰোগী গৰাকীৰ পেটত এটা টেমুনাৰ সৃষ্টি হৈছিল। তেনে এজন বিশেষজ্ঞ চিকিৎসকৰ দ্বাৰা অস্ত্ৰোপচাৰ নকৰোৱাই কিয় প্ৰসূতি চিকিৎসক গৰাকী নিজেই এই অস্ত্ৰোপচাৰ সম্পন্ন কৰিছিল?
- পৰ্যাপ্ত পৰিমাণৰ আন্তঃগাঁঠনি নথকাৰ পিছতে শৰীৰত মাত্ৰ পাঁচ শতাংশ হিম’গ্লবিন থকা ৰোগী গৰাকীক কিয় উক্ত নাৰ্ছিংহোমখনত অস্ত্ৰোপচাৰ সম্পন্ন কৰিছিল চিকৎসক মুখাৰ্জীয়ে?
- জৰুৰীকালীন অস্ত্ৰোপচাৰ সম্পন্ন কৰাৰ ব্যৱস্থা নথকাৰ পিছতো উক্ত নাৰ্ছিংহোমখনত চিকিৎসক মুখাৰ্জীয়ে কিয় ৰোগী গৰাকীক কিয় অস্ত্ৰোপচাৰ সম্পন্ন কৰিছিল?
- স্থানীয় লোকৰ মত অনুসৰি উক্ত নাৰ্ছিংহোমখনত অস্ত্ৰোপচাৰ সম্পন্ন কৰাৰ যাৱতীয় যন্ত্ৰপাতি উপলব্ধ নহয়। তেনে অৱস্থাত কিয় চিকিৎসক মুখাৰ্জীয়ে উক্ত নাৰ্ছিংহোমখনত অস্ত্ৰোপচাৰ সম্পন্ন কৰি থাকে?
- চৰকাৰী বাধ্যবাধকতা থকাৰ পিছতো চৰকাৰী চিকিৎসালয়ৰ এজন প্ৰসূতি চিকিৎসকে নাৰ্ছিংহোমত ৰোগী ভৰ্তি কৰোৱাই নিজে অস্ত্ৰোপচাৰ কৰাৰ অধিকাৰ ক’ত পালে? ৰাজ্যৰ স্বাস্থ্য বিভাগ বা এনে বিষয়ত সৰৱ আৰু দক্ষ স্বাস্থ্যমন্ত্ৰী ডঃ হিমন্ত বিশ্ব শৰ্মাই ইয়াৰ বিৰুদ্ধে কি ব্যৱস্থা গ্ৰহণ কৰিব?
- যদি ডিগবৈ অসামৰিক চিকিৎসালয়ত ৰোগী গৰাকীক চিকিৎসা কৰিবলৈ অক্ষম তেনে উন্নত চিকিৎসাৰ বাবে ডিব্ৰুগড়ৰ অসম চিকিৎসা মহাবিদ্যালয়লৈ প্ৰেৰণ নকৰি চিকিৎসকজনে উক্ত ব্যক্তিগত খণ্ডৰ নাৰ্ছিংহোমখনত ভৰ্তি কৰোৱাই নিজেই কিয় অস্ত্ৰোপচাৰ কৰিছিল?
স্থানীয় তথা পৰিয়ালৰ লোকৰ মতে এই সকলোবোৰ প্ৰশ্ন উত্তৰ মাত্র এটা, অভিযুক্ত চিকিৎসকগৰাকীৰ আৰ্থিক ক্ষুধা!
ইফালে চিকিৎসকজনে অস্ত্ৰোপচাৰ কক্ষৰ পৰা প্ৰথমবাৰ উলাই আহি পৰিয়ালৰ লোকক ৰোগীৰ অস্ত্ৰোপচাৰ সফল হোৱা বুলি দাবী কৰিও ৰোগীৰ ইন্টাৰনেল ব্লিডিং হৈ থকা বুলি জনাইছিল। ক’ৰ পৰা ব্লিডিং হৈছে ধৰিব পৰা নাই বুলি কৈ চিকিৎসকজনে আৰু এটা অস্ত্ৰোপচাৰ কৰিব লাগিব কৈ অস্ত্ৰোপচাৰ কক্ষত প্ৰৱেশ কৰিছিল।এইন কথা প্ৰকাশ কৰিছে পৰিয়ালৰ লোকে।
উল্লেখ্যে যে, দ্বিতীয়টো অস্ত্ৰোপচাৰ কৰাৰ পিছত অত্যধিক ৰক্তক্ষৰণ হৈ ৰোগী প্ৰিয়ংকা দেউৰীৰ মৃত্যুৰ ঘটে।
এতিয়া এটা প্ৰশ্নই উত্থাপন হৈছে, ভুক্তভোগী পৰিয়ালটোৱে ন্যায় পাব নে?
চিকিৎসা বৃত্তিক সম্পদ আহৰণৰ আহিলা হিচাপে ব্যৱহাৰ কৰি অহা চিকিৎসক সৌৰভ মুখাৰ্জী আৰু এম আৰ আগৰৱালা ডায়’গ্নেষ্টিক নাৰ্ছিংহোমখন বিৰুদ্ধে কি ব্যৱস্থা ল’ব ৰাজ্যৰ স্বাস্থ্য মন্ত্ৰী ডঃ হিমন্ত বিশ্ব শৰ্মাই?