গংগা স্নান কৰি আধ্যাত্মিক অনুভূতি লাভ দক্ষিণ আফ্ৰিকাৰ প্ৰাক্তন ক্ৰিকেটাৰ জণ্টি ৰোডছৰ

বৰ্তমান পৰিয়ালৰ সৈতে ভাৰত ভ্ৰমণত ব্যস্ত আছে ক্ৰিকেট ইতিহাসৰ সৰ্বশ্ৰেষ্ঠ ফিল্ডাৰ জণ্টি ৰোডছ।

জন্টি ৰোডছে ভাৰত ভ্ৰমণৰ সময়ত ঋষিকেশত গংগা স্নান কৰে।

জণ্টি ৰোডছে গংগা স্নান কৰাৰ ফটো ছ’চিয়েল মিডিয়াত আপলোড কৰাৰ পাছত ফটোত মন্তব্য প্ৰকাশ কৰিছে ভাৰতৰ তাৰকা স্পীনাৰ হৰভজন সিঙে।

‘‘বন্ধু তুমি মোতকৈ ভাৰত বেছিকৈ দেখিছা। আনন্দৰে পবিত্ৰ গংগাত স্নান কৰা দেখি ভাল লাগিছে। পৰৱৰ্তীবাৰ মোকো লগত লৈ যাবা,’’ হৰভজন সিঙে টুইটাৰত জণ্টি ৰোডছৰ ফটোত উত্তৰ দিয়ে।

‘‘পবিত্ৰ গংগাৰ শীতল পানীত স্নান কৰি শাৰীৰিক আৰু আধ্যাত্মিক ভাৱে উপকৃত হৈছো,’’ গংগা স্নানৰ ফটো টুইটাৰত আপলোড কৰি ৫০ বৰ্ষীয় দক্ষিণ আফ্ৰিকান প্ৰাক্তন ক্ৰিকেটাৰ গৰাকীয়ে এনেদৰে লিখিছিল।

উল্লেখযোগ্য যে, হৰভজন সিং আৰু জণ্টি ৰোডছে আইপিএলত মুম্বাই ইণ্ডিয়ানছৰ হৈ একেলগে কাম কৰিছিল।