শিলাদিত্যক পুনৰ বিজেপিৰ মজিয়ালৈ ঘূৰাই আনিবলৈ দলীয় নেতৃত্বক আহ্বান জ্যেষ্ঠ বিজেপি ৰাজেন গোহাঁইৰ

দেওবাৰে বিজেপিৰ পৰা অৱসৰ লোৱাৰ কথা ঘোষণা কৰা জ্যেষ্ঠ বিজেপি নেতা তথা হোজাইৰ বিধায়ক শিলাদিত্য দেবক দলৰ মজিয়ালৈ ঘূৰাই আনিবলৈ দলীয় নেতৃত্বক আহ্বান জনাইছে জ্যেষ্ঠ বিজেপি নেতা ৰাজেন গোহাঁইয়ে।

এক ফেচবুক পোষ্টৰ জৰিয়তে প্রাক্তন কেন্দ্রীয় মন্ত্রী গোহাঁইয়ে কয়, “মই সামাজিক মাধ্যমৰ যোগেদি দলৰ ৰাজ্যিক নেতৃবৃন্দক নিম্নলিখিত বিষয়টোৰ ওপৰত দলীয় স্বাৰ্থত অৱগত কৰো যে হোজাই সমষ্টিৰ বিধায়ক শ্ৰী শিলাদিত্য দেৱে দলৰ পৰা অব্যাহতি ঘোষণা কৰাটো দলৰ বাবে এক অত্যন্ত দুঃখৰ বিষয়।”

“মই ৰাজ্যিক নেতৃত্বক অনুৰোধ জনাওঁ যে এই বিষয়টো সহজভাৱে নলৈ অতি গুৰুত্বসহকাৰে বিষয়টো পৰ্যালোচনা কৰি তেখেতক দলৰ মজিয়ালৈ ঘূৰাই অনাটো নিতান্ত প্ৰয়োজনীয়।” গোহাঁইয়ে লগতে লিখিছে।

গোহাঁইৰ মতে “শিলাদিত্যৰ নিচিনা এক বলিষ্ঠ বিধায়ক ২০২১ চনৰ নিৰ্বাচনৰ আগমুহূৰ্তত দল ত্যাগ কৰাটো দলৰ বাবে এক অশনি সংকেত। আগলৈ ই দলৰ বাবে এক গঢ়াখহনীয়া ৰূপ ধাৰণ কৰিব পাৰে।”

এই বিষয়টোত গোহাঁইয়ে মুখ্যমন্ত্ৰী সৰ্বানন্দ সোণোৱাল আৰু ৰাজ্যিক সভাপতি ৰঞ্জিত দাসৰ প্ৰত্যক্ষ হস্তক্ষেপ আৰু ইতিবাচক পৰ্য্যালোচনাৰ আশা কৰে।

তেওঁ আৰু লিখিছে, “মই আশাবাদী যে বহু দলীয় কাৰ্য্যকৰ্তাৰ ৩০-৩৫ বছৰৰ ত্যাগ আৰু কষ্টৰ বিনিময়ত আজি আমি এই দিনৰ মুখ দেখিবলৈ সক্ষম হোৱা বিজেপি অসম প্ৰদেশে দলৰ প্ৰত্যেক কাৰ্য্যকৰ্তাক গুৰুত্ব প্ৰদান কৰি দলীয় মজিয়াত আকোৱালি ৰখাতো অত্যন্ত জৰুৰী।”

উল্লেখযোগ্য যে, বিজেপিৰ পৰা অৱসৰ লোৱাৰ কথা ঘোষণা কৰি শিলাদিত্যই বৰ্তমান তেওঁৰ বিজেপিত অস্তিত্ব নোহোৱা বুলি আক্ষেপ কৰিছিল।