অবৈধভাৱে টোল কৰ সংগ্ৰহৰ অপৰাধত গ্ৰেপ্তাৰ চাৰিজন

অসম আৰক্ষীয়ে গোসাঁইগাঁওৰ তেলীপাৰা টোলগেটত অবৈধভাৱে টোল সংগ্ৰহ আৰু ধন দাবীৰ অভিযোগত চাৰিজন লোকক গ্ৰেপ্তাৰ কৰিছে। অন্য ৰাজ্যৰ পৰা সামগ্ৰী কঢ়িয়াই অনা ট্ৰাকবোৰক ৰখাই অতিৰিক্ত  সামগ্ৰী কঢ়িয়াই অনাৰ অজুহাতত অবৈধভাৱে ধন আদায় কৰি আছিল।

আৰক্ষীৰ তথ্য অনুসৰি, এই লোকসকলে ট্ৰাকৰ কোনো চৰকাৰী ওজন পৰীক্ষা নকৰাকৈ চালকসকলক ভয়-ভাবুকি দেখুৱাই ধন দাবী কৰিছিল। ইয়াৰ উপৰি কিছু ট্ৰাক চালকক শাৰীৰিকভাৱে নিৰ্যাতন কৰাৰো অভিযোগ উঠিছে।

গোসাঁইগাঁও আৰক্ষীৰ অভিযানৰ ফলত এই চাৰিজনক গ্ৰেপ্তাৰ কৰাৰ লগতে গোসাঁইগাঁও থানাত ৪৮/২ নম্বৰত গোচৰ ৰুজু কৰা হৈছে। গ্ৰেপ্তাৰ হোৱা লোকসকলৰ ভিতৰত উত্তৰ প্ৰদেশৰ গোপাল শকিয়াৱৰ, ৰাজস্থানৰ ৰাম কৰণ বিজাৰ্নিয়া আৰু ৰাজেন্দ্ৰ সিং । চতুৰ্থজনৰ পৰিচয় এতিয়াও চিনাক্ত কৰা হোৱা নাই।

কৰ্তৃপক্ষই জনোৱা মতে, এই অবৈধ কামৰ পৰিসৰ বুজিবলৈ আৰু জড়িত আন লোকসকলক চিনাক্ত কৰিবলৈ তদন্ত চলি আছে। এই ঘটনাই অঞ্চলটোত চৰকাৰী নীতি-নিয়মৰ লগত সংগতি ৰাখি টোল সংগ্ৰহৰ প্ৰক্ৰিয়াৰ ওপৰত প্ৰশ্ন উত্থাপন কৰিছে।