পুনৰ উত্তপ্ত মণিপুৰঃ ম’ৰেহত আৰক্ষীৰ ওপৰত আক্ৰমণ সশস্ত্ৰ দলৰ, এজন কমাণ্ডো নিহত
গোষ্ঠীসংঘৰ্ষই জুৰুলা কৰা অশান্ত মণিপুৰত যেন এতিয়াও সুদূৰপৰাহত শান্তি। ৰাজ্যখনত আজি পুনৰ সৃষ্টি হৈছে সংঘৰ্ষৰ। এই সংঘৰ্ষত প্ৰাণ হেৰুৱাইছে মণিপুৰ আৰক্ষীৰ এজন কমাণ্ডোৱে।
ৰাজধানী ইম্ফলৰ পৰা ১১০ কিলোমিটাৰ নিলগৰ সীমান্ত চহৰ ম’ৰেহত হৈছে এই ঘটনা। প্ৰকাশিত খবৰ অনুসৰি সশস্ত্ৰ আক্ৰমণকাৰীৰ এটা দলে ”ৰেহৰ সমীপৰ এটা নিৰাপত্তা চকীত চলায় এই আক্ৰমণ।
আক্ৰমণকাৰী দলটোৱে অস্থায়ী কমাণ্ডো চকীত আক্ৰমণ কৰি ওচৰে পাজৰে ৰখাই থোৱা কেইবাখনো বাহনৰ ক্ষতিসাধন কৰে। এই আক্ৰমণত নিহত কমাণ্ডো জোৱানজনক ৱাংখেম সোমৰজিত বুলি চিনাক্ত কৰা হৈছে।
আৰক্ষীয়ে এজন আৰক্ষী বিষয়াৰ হত্যাকাণ্ডৰ সৈতে জড়িত দুজন জনজাতীয় লোকক গ্ৰেপ্তাৰ কৰাৰ পিছতে কুকি গোটৰ ব্যাপক প্ৰতিবাদ গঢ়ি তুলিছিল। তাৰ মাজতে সংঘটিত হৈছে এই হিংসাত্মক ঘটনা।
এই সংঘৰ্ষৰ এটা ভিডিঅ’ সম্প্ৰতি ভাইৰেল হৈ পৰিছে। ভিডিঅ’টোত সশস্ত্ৰ আক্ৰমণকাৰীৰ এটা দলে ম’ৰেহত প্ৰৱেশ কৰিবলৈ চেষ্টা কৰা এখন নিৰাপত্তাৰক্ষী ট্ৰাক আগচি ধৰা দেখিবলৈ পোৱা গৈছে।
পুৱাৰে পৰা অঞ্চলটোত সংঘৰ্ষ অব্যাহত আছে বুলি চৰকাৰী সূত্ৰই প্ৰকাশ কৰিছে।