মুখ্য ন্যায়াধীশৰ ক্ষমতা কাঢ়িলে বিজেপিয়ে : এতিয়াৰে পৰা কাৰ্যতঃ চৰকাৰৰ হাতত থাকিব নিৰ্বাচন আয়ুক্ত বাছনি কৰাৰ ক্ষমতা

এতিয়াৰে পৰা নিৰ্বাচন আয়োগৰ আয়ুক্ত বাছনি কৰা কমিটীত নাথাকিব উচ্চতম ন্যায়ালয়ৰ মুখ্য ন্যায়াধীশ। মুখ্য ন্যায়াধীশৰ পৰিৱৰ্তে এই বাছনি কমিটীত থাকিব প্ৰধানমন্ত্ৰীয়ে নিয়োগ কৰা এজন কেন্দ্ৰীয় মন্ত্ৰী। নিৰ্বাচন আয়ুক্তক নিযুক্তি দিয়াৰ ক্ষমতা কাৰ্যতঃ এতিয়াৰে পৰা চৰকাৰৰ হাতত।

চলিত বৰ্ষৰ ১০ আগষ্টত ৰাজ্যসভাত ‘মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্ত’ (নিযুক্তি, সেৱাৰ চৰ্ত আৰু কাৰ্যভাৰৰ চৰ্ত) বিধেয়ক উত্থাপন কৰি বিবেচনাৰ বাবে প্ৰেৰণ কৰা হয়। 

মঙলবাৰে উচ্চ সদনত আইন মন্ত্ৰী অৰ্জুন ৰাম মেঘৱালে বিধেয়কখন দাখিল কৰে।

বিধেয়কখন দাখিল কৰাৰ পাছত আইন মন্ত্ৰীগৰাকীয়ে কয় যে মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্তৰ নিযুক্তিৰ বাবে পূৰ্বৰ আইনখনত কেইবাটাও সুৰুঙা আছিল। সেই অভাৱ দূৰ কৰিবলৈ নতুন বিধেয়ক অনা হৈছে ।

এই নতুন বিধেয়ক অনুসৰি মুখ্য নির্বাচন আয়ুক্ত আৰু অন্যান্য নির্বাচন আয়ুক্তক নিযুক্তিৰ বাছনি সমিতিখন এতিয়াৰ পৰা প্রধানমন্ত্রী, প্রধানমন্ত্রীয়ে মনোনীত কৰা কেন্দ্রীয় মন্ত্রী আৰু বিৰোধী দলপতিৰে গঠিত হ’ব৷ ইয়াৰ পূৰ্বে এই কমিটীত আছিল প্ৰধানমন্ত্ৰী, দেশৰ মুখ্য ন্যায়াধীশ আৰু বিৰোধী দলৰ নেতা।

ইয়াৰ উপৰিও আইন মন্ত্ৰীয়ে অনুসন্ধান সমিতি গঠন কৰিব যিয়ে অনুসন্ধান সমিতিৰ পেনেল আয়ুক্তসকলৰ নাম নিৰ্বাচন কৰিব। আইন মন্ত্ৰীয়ে নিৰ্বাচিত কৰা তিনিজনীয়া কমিটীয়ে সম্ভাৱ্য নিৰ্বাচনী আয়ুক্তৰ নাম নিৰ্ধাৰণ কৰিব। ইয়াৰ পূৰ্বে কেবিনেট সচিবৰ নেতৃত্বত এই কমিটী গঠন কৰা হৈছিল।