বটদ্ৰৱা থানক গেৰুৱাকৰণৰ চেষ্টা কৰা সাধাৰণ সম্পাদকক দায়িত্বৰ পৰা অব্যাহতি

গুৰুজনাৰ জন্মস্থান তথা বৈষ্ণৱ ভকতৰ অতি শ্ৰদ্ধেয় বটদ্ৰৱা থানক গেৰুৱাকৰণ কৰিব খোজা থানখনৰ পৰিচালনা সমিতিৰ সাধাৰণ সম্পাদক ব্ৰজেন কাকতীক অব্যাহতি দিছে সমিতিয়ে। ৩০ ডিচেম্বৰত বহা সমিতিৰ এখন কাৰ্য্যনিৰ্বাহক সভাত এই সিদ্ধান্ত লোৱা হয়।

কাকতীয়ে দীৰ্ঘদিনৰ পৰা থানখনক গেৰুৱাকৰণ কৰাৰ চেষ্টা অব্যাহত ৰাখিছিল বুলি অভিযোগ উত্থাপন কৰি আহিছিল স্থানীয় একাংশ বৈষ্ণৱ অনুৰাগী আৰু সমিতিৰে কিছু সংখ্যক সদস্যই। তেওঁৰ পদত্যাগ দাবী কৰি আহিছিল এইসকল ক্ষুব্ধ লোকে। পঞ্চায়ত নিৰ্বাচনৰ পিছতে তেওঁৰ ভূমিকাক লৈ অতি সৰৱ হৈ পৰিছিল বটদ্ৰৱাবাসীৰ লগতে সমিতিৰে কিছু সংখ্যক বিষয়ববীয়া। ফলত কেইদিন মানৰ পূৰ্বে ব্ৰজেন কাকতীয়ে বেক ডেটত চহী কৰি থান সমিতিৰ সভাপতি দেবানন্দ দেৱ গোস্বামীৰ হাতত নিজৰ পদত্যাগ পত্ৰ দিয়ে।

সমিতিয়ে ৩০ ডিচেম্বৰত এক কাৰ্য্যনিৰ্বাহক বৈঠক পাতি কাকতীৰ পদত্যাগ পত্ৰত অনুমোদন জনায়।

মন কৰিব লগীয়া যে ব্ৰজেন কাকতী বৈষ্ণৱ ধৰ্মীয় গুৰুত্বপূৰ্ণ অনুষ্ঠানটোত থাকিও হিন্দু যুৱ ছাত্ৰ পৰিষদৰ মুখ্য উপদেষ্টা হিচাপেও দায়িত্ব লৈ আহিছিল।

কিন্তু থান পৰিচালনা সমিতিৰ সাধাৰণ সম্পাদক হোৱাৰ সুবাদতে ব্ৰজেন কাকতীয়ে উদাৰ বৈষ্ণৱ ধৰ্মৰ প্ৰতিষ্ঠাপকজনৰ জন্মস্থানত থকা বটদ্ৰৱা থানক আৰ এছ এছৰ প্ৰশিক্ষণ স্থলীলৈ পৰিণত কৰি আহিছিল। ২০১৭ চনৰ জুলাই মাহত সত্ৰৰ ভিতৰত আৰ এছ এছৰ এটা প্ৰশিক্ষণ শিবিৰ পতাক লৈ স্থানীয় ৰাইজ ক্ষুব্ধ হৈ পৰিছিল।

লগতে এই বছৰৰ ছেপ্তেম্বৰ মাহত সত্ৰখনত অনুষ্ঠিত শ্ৰীমন্ত শংকৰদেৱৰ ৫৭০ সংখ্যক জন্মজয়ন্তী বা গুৰুজয়ন্তীৰ কাৰ্যসূচীত মহাপুৰুষীয়া আধ্যাত্মিকতাৰ পৰিৱৰ্তে দুৰ্গা পূজা সদৃশ পৰিৱেশ দিয়াৰ আঁৰতো সাধাৰণ মস্পাদক কাকতীৰ হিন্দুত্বকৰণৰ প্ৰয়াস বুলি বহুতে অভিযোগ কৰিছিল। তাৰোপৰি উক্ত গুৰুজয়ন্তীৰ কাৰ্য্যসূচীক ৰাজনৈতিক সভালৈ পৰিণত কৰিছিল থান পৰিচালনা সমিতিয়ে।

স্থানীয় লোক আৰু পৰিচালনা সমিতিৰ কিছু বিষয়ববীয়াৰ আপত্তি আৰু ক্ষোভ সত্ত্বেও ৰাজনৈতিক ক্ষমতাৰে বলীয়ান বাবেই ব্ৰজেন কাকতীৰ সত্ৰখনক এই গেৰুৱাকৰণ অভিযানক সমিতিয়ে বাধা দিব পৰা নাছিল। তেওঁৰ বিৰুদ্ধে কোনো ব্যৱস্থা গ্ৰহণ কৰাও হোৱা নাছিল। কিন্তু যোৱা পঞ্চায়ত নিৰ্বাচনৰ সময়ত ব্ৰজেন কাকতীয়ে সোঁশৰীৰে বিজেপিৰ নিৰ্বাচনী প্ৰচাৰ সভাত উপস্থিত থাকি বিজেপিক ভোট দিবলৈ ৰাইজক মুকলিকৈ আহ্বান জনাই ভাষণ দিয়ে। লগতে কংগ্ৰেছ-অগপক ক্ষুৰধাৰ সমালোচনা কৰিছিল।

এইবোৰ দেখি-শুনিও সমিতিয়ে কাকতীৰ বিৰুদ্ধে একো ব্যৱস্থা ল’বলৈ সাহস কৰা নাছিল। কাৰণ সমষ্টিটোৰ বিজেপি বিধায়িকা আঙুৰলতাৰ সৈতে তেওঁৰ ঘনিষ্ঠতা আৰু ৰাজনৈতিক প্ৰভাৱৰ বাবে সাহস কৰা নাছিল।

অৱশেষত ৰাইজৰ তীব্ৰ সমালোচনাৰ মুখত পৰি কাকতীয়ে পদত্যাগ পত্ৰ দিয়াৰ পিছতহে ৩০ ডিচেম্বৰত বটদ্ৰৱা থান পৰিচালনা সমিতিৰ সভাপতি দেবানন্দ দেৱ গোস্বামীৰ সভাপতিত্বত অনুষ্ঠিত কাৰ্য্যনিৰ্বাহকে তেওঁক অব্যাহতি দিয়াৰ সিদ্ধান্ত লয়।

কাৰ্য্যনিৰ্বাহকে কাকতীৰ ঠাইত বৰ্তমানৰ সহকাৰী সম্পাদক তথা শ’লগুৰি সত্ৰৰ আজীৱন সদস্য ইন্দ্ৰমোহন বৰুৱাক সাধাৰণ সম্পাদকৰ দায়িত্ব অৰ্পণ কৰে। ইয়াৰোপৰি খালী হোৱা সহকাৰী সম্পাদকৰ পদত ৰাইদঙীয়াৰ আজীৱন সদস্য লক্ষী শইকীয়াক মনোনীত কৰে কাৰ্যনিবাহক সভাই৷

গুৰুজনাৰ জন্মস্থানত থকা থানখনৰ পৰিচালনা সমিতিৰ সাধাৰণ সম্পাদকৰ পত থাকি উদাৰ বৈষ্ণৱ ধৰ্মীয় অনুষ্ঠান এটাক গেৰুৱাকৰণেৰে ধ্বংস কৰিব খোজা কাকতীৰ বিদায়ত সন্তুষ্টি প্ৰকাশ কৰিছে বটদ্ৰৱাবাসীয়ে।