শুকুৰবাৰে নিশা মিৰ্জাত তীব্ৰ বেগী ট্ৰাকৰ মুখামুখি সংঘৰ্ষ; চাৰিগৰাকী লোকৰ থিতাতে কৰুণ মৃত্যু

শুকুৰবাৰে নিশা মিৰ্জাত সংঘটিত হোৱা এক ভয়াবহ পথ দুৰ্ঘটনাত চাৰিগৰাকী লোকৰ থিতাতে মৃত্যু হোৱাৰ লগতে এজন লোক গুৰুতৰভাৱে আঘাতপ্ৰাপ্ত হয়।

দুৰ্ঘটনাত প্ৰাণ হেৰুৱা লোক কেইগৰাকীৰ পৰিচয় বৰ্তমানলৈ জানিব পৰা হোৱা নায়।

আনহাতে, ঘটনাস্থলীত আৰক্ষীৰ দল উপস্থিত হৈ আঘাতপ্ৰাপ্ত লোকগৰাকীক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰাৰ লগতে মৃত্যু হোৱা লোক কেইগৰাকীৰ মৃতদেহৰ মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে।

জানিব পৰা মতে, শুকুৰবাৰে নিশা গুৱাহাটী মুখি এছ এছ-০১-এল চি-৫২৪৪ নম্বৰৰ এখন বালি ভৰ্তি ট্ৰাক আৰু বিপৰীত দিশৰ পৰা আহি থকা উব্লিউ বি-৬১-এ-৬০৬৬ নম্বৰৰ এখন মালবাহী ট্ৰাকৰ মাজত সংঘটিত হোৱা মুখামুখি সংঘৰ্ষৰ ফলতে কৰুণ পথ দুৰ্ঘটনাটো সংঘটিত হয়।

দুৰ্ঘটনাটো সংঘটিত হোৱাৰ সময়ত দুয়োকন বাহন ইমানেই তীব্ৰ বেগত আছিল যে বাহন দুখনত থকা চালক তথা কৰ্মচাৰীয়ে প্ৰাণ ৰক্ষাৰ কোনোধৰণৰ সুযোগে লাভ নকৰিলে।

পৰৱৰ্তী সময়ত ঘটনাস্থলীত আৰক্ষীৰ দল উপস্থিত হৈ মৃতদেহ সমূহ উদ্ধাৰ কৰে আৰু দুৰ্ঘটনাগ্ৰস্ত বাহন দুখন পথৰ পৰা আতৰ কৰি পথচোবা যান-বাহন চলাচলৰ বাবে মুকলি কৰি দিয়ে।