দক্ষিণ আফ্ৰিকাৰ বিৰুদ্ধে ৰাঁচী টেষ্টত ভাৰতীয় দলত অভিষেক ছাহবাজ নাদিমৰ

আজিৰ পৰা ভাৰত আৰু দক্ষিণ আফ্ৰিকাৰ মাজত ৰাঁচীত অনুষ্ঠিত হোৱা টেষ্ট শৃংখলাৰ তৃতীয় তথা অন্তিম টেষ্টত ভাৰতীয় দলৰ হৈ অভিষেক ঘটিছে বাওঁহতীয়া স্পীনাৰ ছাহবাজ নাদিমৰ।

কান্ধৰ আঘাতত ভোগা কুলদীপ যাদৱৰ স্থানত দলত অন্তৰ্ভুক্ত কৰা হৈছে নাদিমক।

২০০৪ চনত ঝাৰখণ্ডৰ হৈ কেৰেলাৰ বিৰুদ্ধে প্ৰথম শ্ৰেণীৰ ক্ৰিকেটত অভিষক ঘটা নাদিমে বৰ্তমানলৈ প্ৰথম শ্ৰেণীৰ খেলত ৪২৪ টা উইকেট দখল কৰিছে।

২০১৫-১৬ আৰু ২০১৬-১৭ বৰ্ষৰ ৰঞ্জী ট্ৰফী প্ৰতিযোগিতাত নাদিম সৰ্বাধিক উইকেট দখল কৰা বলাৰ আছিল।

বিগত বৰ্ষৰ ৰঞ্জী ট্ৰফীতো নাদিমে মুঠ ৩৭ টা উইকেট দখল কৰিছিল।

বাওঁহতীয়া স্পীনাৰগৰাকীয়ে ভাৰতীয় এ দলৰহৈ সদ্যসমাপ্ত ৱেষ্ট ইণ্ডিজ ভ্ৰমণৰ সময়তো ১৫ টা উইকেট দখল কৰি উল্লেখনীয় প্ৰদৰ্শন দাঙি ধৰে।

নিম্নক্ৰমত ভাল বেটিং কৰাৰ দক্ষতা থকা নাদিমে প্রথম শ্ৰেণীৰ ক্ৰিকেটত সাতটা অৰ্ধশতক আৰু এটা শতক অৰ্জন কৰিছে।

উল্লেখযোগ্য যে, প্ৰথম দুখন টেষ্টত জয়ী হৈ ভাৰতে ইতিমধ্যে তিনিখন খেলৰ টেষ্ট শৃংখলাটো দখল কৰিছে।