অবৈধ বালি খননেৰে ৰেলপথ নিৰ্মাণৰ কাম: চাপৰত এন চি দাস এণ্ড কোম্পানীৰ ডাম্পাৰ-এক্সকেভেটাৰ জব্দ

ৰে’লপথ নিৰ্মাণত নিয়োজিত ঠিকাদাৰী প্ৰতিষ্ঠান ‘এন চি দাস এণ্ড কোম্পানীয়ে ৰেলপথ নিৰ্মাণৰ গইনা লৈ ধুবুৰী জিলাৰ বৃহত্তৰ চাপৰ আৰু পাৰ্শ্বৱৰ্তী এলেকাৰ বনাঞ্চল আৰু পাহাৰৰ মাটি অবৈধভাবে খনন কৰাৰ পাছত এইবাৰ অবৈধ ভাৱে নদীৰ বালি খননতো লিপ্ত হোৱাৰ অভিযোগ উত্থাপিত হৈছে।

ঠিকাদাৰী কোম্পানীটোৱে এইদৰে বহলপুৰ বনাঞ্চলিক কাৰ্য্যালয়ৰ প্ৰায় গাতে লাগি থকা চম্পা নৈৰ ঘাটৰ পৰা অবৈধ ভাৱে বালি খনন কৰি থকা প্ৰত্যক্ষ কৰি স্থানীয় যুৱকৰ দল এটাই বহলপুৰস্থিত বনাঞ্চলিক বিষয়াৰ কাৰ্যালয়ত খবৰ দিয়ে ।

পাছত বনাঞ্চলিক বিষয়া উত্তম সেনাপতিয়ে বনকৰ্মীৰ দলসহ ঘটনাস্থলীত উপস্থিত হৈ কোম্পানীটোৰ এ, এছ ০১বি চি ৭৩৭৫ নম্বৰৰ ডাম্পাৰ এখন আৰু এ ,এছ ০১ডি ৯৫৬৩ নম্বৰৰ ‘এক্সকেভেটাৰ’এখন জব্দ কৰি বন কাৰ্যালয়লৈ লৈ আহে।

উল্লেখ্য যে ঠিকাদাৰী প্ৰতিষ্ঠানটোৰ বিৰুদ্ধে দীৰ্ঘদিন ধৰি ৰাজহ ফাঁকিৰে অবৈধ মাটি আৰু বালি খননৰ অভিযোগ উত্থাপিত হৈ থকাৰ পাছতো বনবিভাগে দীৰ্ঘদিন ধৰি কোনো পদক্ষেপ গ্ৰহণ কৰাৰ পৰিৱৰ্তে একপ্ৰকাৰ কুম্ভকৰ্ণ নিদ্ৰাত থকাৰ ঘটনাই ৰাইজৰ মাজত ৰহস্যৰ সৃষ্টি কৰিছে।