ক’ৰ’না নাহিলে বিশ্বৰ শীৰ্ষ তিনি অৰ্থনীতিৰ দেশ হ’লহেতেন ভাৰত : ৰাজনাথ সিং
মহামাৰী ক’ৰ’না ভাইৰাছৰ প্ৰভাৱ ভাৰতত নপৰিলে অহা ৭-৮ বছৰৰ ভিতৰত দেশৰ অৰ্থব্যৱস্থা বিশ্বৰ শীৰ্ষ তিনিখন দেশৰ ভিতৰত থাকিলে হয় বুলি প্ৰতিৰক্ষা মন্ত্ৰী ৰাজনাথ সিঙে মন্তব্য কৰিছে।
মঙলবাৰে দেশৰ উপ-ৰাষ্ট্ৰপতি ভেংকায়া নাইডুৰ ‘কানেক্টিং, কমিউনিকেটিং এণ্ড চেঞ্জিং’ নামৰ এখন গ্ৰন্থ মুকলি অনুষ্ঠান উপস্থিত থাকি মন্ত্ৰী সিঙে এই মন্তব্য কৰে।
গ্ৰন্থ মুকলি কৰি দিয়া ভাষণত মন্ত্ৰী সিঙে লগতে কয় যে ভাৰত শক্তিশালী ৰূপত আগবাঢ়ি থকাৰ সময়তে ভেংকায়া নাইডু উপ-ৰাষ্ট্ৰপতি হৈছে আৰু সেয়ে তেওঁ ধন্য।
প্ৰধান মন্ত্ৰী নৰেন্দ্ৰ মোদীৰ নেতৃত্বত বিশ্ববাসীৰ আগত ভাৰতক শক্তিশালী ৰূপত প্ৰতিষ্ঠা কৰিবলৈ সক্ষম হোৱা বুলিও মন্তব্য কৰে ৰাজনাথ সিঙে।
তেওঁ কয়, ‘দেশে এক সুন্দৰ আৰ্থিক গতিৰে আগবাঢ়ি আছিল, যদি দেশত ক’ৰ’নাৰ প্ৰভাৱ নপৰিলেহেতেন তেন্তে আমি ৭-৮ বছৰৰ ভিতৰত বিশ্বৰ শীৰ্ষ তিনি অৰ্থনীতিৰ ভিতৰত আহিলোহেতেন। কিন্তু মই ভাবো, আমি এই কাৰ্যত সফল হম। সেয়ে ক’ভিড-১৯ৰ বিৰুদ্ধে আমি দৃঢ়তাৰে যুঁজি আছো’।
ইফালে গ্ৰন্থখন সম্পৰ্কে মন্তব্য কৰি ৰাজনাথ সিঙে কয় যে এই গ্ৰন্থখনে নায়ডুৰ জীৱনক প্ৰতিফলিত কৰে।
উল্লেখ্য যে নাইডুৰ এই গ্ৰন্থখনত তেওঁৰ কেইবাটাও গুৰুত্বপূৰ্ণ ভাষণ সন্নিৱিষ্ট কৰা হৈছে আৰু এই গ্ৰন্থখনে পাঠকক যথেষ্ট জ্ঞান প্ৰজদান কৰিব বুলিও আশা প্ৰকাশ কৰিছে প্ৰতিৰক্ষা মন্ত্ৰী সিঙে।