Covid-19 Update: দেশত দৈনিক কৰ’না আক্ৰান্তৰ সংখ্যা ১৩ হাজাৰ অতিক্ৰম; বৃদ্ধি সক্ৰিয় ৰোগী
মাৰাত্মক কৰ’না ভাইৰাছে আকৌ এবাৰ ইয়াৰ অস্তিত্ব সজোৰে ঘোষণা কৰিছে। যোৱা কেইদিনমানৰ পৰা দেশত দৈনিক সংক্ৰমণ বৃদ্ধি পাইছে। যোৱা মাহত দৈনিক আক্ৰান্তৰ সংখ্যা ৫হাজাৰৰ ভিতৰতে আছিল যদিও যোৱা ২৪ ঘণ্টাত ১৩হাজাৰৰ সীমা অতিক্ৰম কৰিছে। উদ্বেগ বঢ়াইছে সক্ৰিয় ৰোগীৰ সংখ্যা বৃদ্ধিয়ে।
শনিবাৰে স্বাস্থ্য আৰু পৰিয়াল কল্যাণ মন্ত্ৰালয়ে জনোৱা তথ্য অনুসৰি যোৱা ২৪ ঘণ্টাত দেশত ১৩,২১৬ জন লোক কৰোনাভাইৰাছৰ দ্বাৰা সংক্ৰমিত হৈছে। শুকুৰবাৰে এই সংখ্যা ১৩হাজাৰৰ তলত আছিল।
লগতে পঢ়ক: Flood in Assam: অৱশেষত শ্বাসৰুদ্ধকৰ পৰিস্থিতিৰ অৱসান; বৰনদীৰ বুকুত আৱদ্ধ ১৪টা পৰিয়ালক উদ্ধাৰ
বিগত ২৪ ঘন্টাত অকল মহাৰাষ্ট্ৰতে ৪হাজাৰৰো অধিক লোক সংক্ৰমিত হৈছে। মুম্বাইতে ২২২৫ জন লোক সংক্ৰমিত হৈছে। ৰাজ্যখনত সক্ৰিয় ৰোগীৰ সংখ্যাও বৃদ্ধি পাইছে।
ৰাজধানী দিল্লীৰ কৰ’না গ্ৰাফো যথেষ্ট উদ্বেগজনক। যোৱা ২৪ ঘন্টাত ১৭৯৭ জন লোকৰ শৰীৰত কৰ’নাৰ সংক্ৰমণ ঘটিছে।
স্বাস্থ্য মন্ত্ৰালয়ৰ তথ্য অনুসৰি দেশত যোৱা ২৪ ঘন্টাত ২৩ জন লোকে কৰ’নাত প্ৰাণ হেৰুৱাইছে। এতিয়ালৈকে দেশত মুঠ কোভিড মৃত্যুৰ সংখ্যা হৈছে ৫লাখ ২৪হাজাৰ ৮৪০জন।
লগতে পঢ়ক: Flood in Assam: নেৰানেপেৰা বৰষুণৰ ফলত বিপৰ্যস্ত অসম; বানত ৩১ জনৰ মৃত্যু, ৩০০০ গাঁও পানীৰ তলত
যোৱা ২৪ ঘণ্টাত সক্ৰিয় কৰ’না ৰোগীৰ সংখ্যাও যথেষ্ট বৃদ্ধি পাইছে। দেশত সক্ৰিয় ৰোগীৰ সংখ্যা এতিয়া ৬৮,১০৮ লৈ বৃদ্ধি পাইছে। সমগ্ৰ দেশতে সক্ৰিয় ৰোগীৰ হাৰ ০.১৬ শতাংশলৈ বৃদ্ধি পাইছে।
অৱশ্যে তাৰ মাজত একমাত্ৰ সকাহৰ বিষয়টো হৈছে সুস্থতাৰ হাৰ। পৰিসংখ্যা অনুসৰি এতিয়ালৈকে দেশত ৪ কোটি ২৬ লাখ ৯০ হাজাৰ ৮৪৫ জন লোকক কৰ’নাৰ পৰা সুস্থ হৈ উঠিছে। ইয়াৰ ভিতৰত যোৱা ২৪ ঘণ্টাত ৮হাজাৰ ১৪৮ জন লোক কৰ’নাৰ পৰা আৰোগ্য হৈছে। সুস্থতাৰ হাৰ ৯৮.৬৩ শতাংশ।
স্বাস্থ্য আৰু পৰিয়াল কল্যাণ মন্ত্ৰালয়ে প্ৰদান কৰা তথ্য অনুসৰি দেশত এতিয়ালৈকে ১৯৬ কোটিৰো অধিক লোকক কৰ’নাৰ ভেকচিন প্ৰদান কৰা হৈছে। ইয়াৰ ভিতৰত যোৱা ২৪ ঘন্টাত প্ৰায় ১৫ লাখ লোকক ভেকচিন প্ৰদান কৰা হৈছে।
টিকাকৰণৰ লগতে কৰ’না ৰোগী চিনাক্ত কৰাৰ বাবে পৰীক্ষাৰ ওপৰতো গুৰুত্ব আৰোপ কৰা হৈছে। বিগত ২৪ ঘন্টাত দেশত ৪ লাখ ৮৪ হাজাৰ ৯২৪ জন লোকৰ নমুনা পৰীক্ষা কৰা হৈছে।