ৰক্তাক্ত যুদ্ধত উত্তাল মধ্যপ্ৰাচ্য; কুৱেইটত মাৰাত্মক আক্ৰমণত নিহত ভাৰতীয়, ইয়াকে লৈ মুঠ ৮ জন

মধ্যপ্ৰাচ্যৰ যুদ্ধৰ পৰিস্থিতি দিনক দিনে অধিক অৱনতি ঘটিছে। সোমবাৰে পুৱা কুৱেইটৰ বিদ্যুৎ আৰু পানী পৰিশোধন প্লাণ্টত ইৰাণৰ মাৰাত্মক ক্ষেপণাস্ত্ৰ আক্ৰমণত এজন ভাৰতীয় শ্ৰমিক নিহত হয়। ইয়াৰ লগে লগে পশ্চিম এছিয়াত সংঘাত আৰম্ভ হোৱাৰ পাছৰে পৰা মুঠ কমেও ৮ জন ভাৰতীয় নাগৰিকৰ মৃত্যু হৈছে।

কুৱেইটৰ বিদ্যুৎ আৰু জল মন্ত্ৰালয়ে ইয়াৰ এক্স হেণ্ডেলত কয় যে এই আক্ৰমণত প্ৰকল্পটোৰ এটা সেৱা ভৱন ব্যাপকভাৱে ক্ষতিগ্ৰস্ত হৈছে। কুৱেইট চৰকাৰে ইয়াক ‘জঘন্য ইৰাণী আগ্ৰাসন’ বুলি গৰিহণা দিয়ে। তৎক্ষণাত জৰুৰীকালীন উদ্ধাৰকাৰী দল আৰু কাৰিকৰী দলক ঘটনাস্থলীলৈ প্ৰেৰণ কৰি বিদ্যুৎ আৰু পানী যোগান পুনৰ সুচল কৰা হয়।

ইয়াৰ পূৰ্বে বৃহস্পতিবাৰে সংযুক্ত আৰব আমিৰশ্বাহীৰ আবুধাবিত বেলিষ্টিক ক্ষেপণাস্ত্ৰ প্ৰতিহত কৰাৰ সময়ত ধ্বংসাৱশেষ পৰি এজন ভাৰতীয় নাগৰিকৰ মৃত্যু হয়। শুকুৰবাৰে ভাৰত চৰকাৰে ঘোষণা কৰে যে যুদ্ধত এতিয়ালৈকে ৭ জন ভাৰতীয় নিহত হৈছে আৰু এজন নিৰুদ্দেশ হৈছে। সোমবাৰৰ এই ঘটনাৰ পিছতে মৃত্যু হোৱা লোকৰ সংখ্যা আঠজনলৈ বৃদ্ধি পাইছে।

আল জাজিৰাৰ তথ্য অনুসৰি সোমবাৰে পুৱা কেৱল কুৱেইটতে নহয়, বাহৰেইন, সংযুক্ত আৰব আমিৰশ্বাহী আৰু চৌদি আৰৱতো বিমান আক্ৰমণৰ ছাইৰেন শুনা যায়। নিৰাপত্তাৰক্ষীয়ে জনোৱা মতে, বাহৰেইনৰ বাসিন্দাসকলে তীব্ৰ বিস্ফোৰণৰ শব্দ শুনিছিল, যিটো মূলতঃ ক্ষেপণাস্ত্ৰ প্ৰতিহত কৰাৰ ফলত হৈছিল।

ইৰাণৰ ওপৰত আমেৰিকা আৰু ইজৰাইলৰ যৌথ আক্ৰমণৰ পিছতে আৰম্ভ হৈছিল পাঁচ সপ্তাহজোৰা যুদ্ধ। ইয়াৰ প্ৰতিশোধ হিচাপে ইৰানে মধ্যপ্ৰাচ্যৰ বিভিন্ন দেশৰ আমেৰিকাৰ ঘাটি আৰু আন্তঃগাঁথনিত ড্ৰোন আৰু মিছাইল আক্ৰমণ চলাইছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পে আলোচনাৰ কথা কৈছে যদিও যুদ্ধ বন্ধ কৰাৰ কোনো ইংগিত দিয়া নাই। যোৱা সপ্তাহত ট্ৰাম্পে ইৰাণৰ শক্তি প্ৰকল্পসমূহৰ ওপৰত আক্ৰমণ ১০ দিনৰ বাবে স্থগিত ৰখাৰ কথা ঘোষণা কৰিছিল যদিও ইৰাণে সকীয়াই দিছে যে যদি আক্ৰমণ কৰা হয় তেন্তে উপসাগৰীয় দেশসমূহৰ শক্তিৰ আন্তঃগাঁথনি ধ্বংস কৰিব। ইৰাণে বৰ্তমান বিশ্বৰ গুৰুত্বপূৰ্ণ জলপথ হৰমুজ প্ৰণালী কাৰ্যকৰীভাৱে বন্ধ কৰি দিছে। ইয়াৰ ফলত বিশ্বজুৰি তেলৰ মূল্য বৃদ্ধি আৰু বিশ্ব অৰ্থনীতিত অস্থিৰতাৰ সৃষ্টি হৈছে।

পৰিস্থিতিৰ সৈতে মোকাবিলা কৰিবলৈ ট্ৰাম্প প্ৰশাসনে এই অঞ্চললৈ অতিৰিক্ত আমেৰিকাৰ মেৰিনক নিয়োগ কৰিছে আৰু আৰু হাজাৰ হাজাৰ সৈন্য প্ৰেৰণৰ বাবে প্ৰস্তুতি চলাইছে। মধ্যপ্ৰাচ্যৰ পৰিস্থিতি বৰ্তমান চৰম অনিশ্চয়তাৰ দিশে আগবাঢ়িছে, তাত কাম কৰা প্ৰব্ৰজিত শ্ৰমিকসকলেই ইয়াৰ মূল ভুক্তভোগী।