আঁতৰা নাই লাডাখ সংকটঃ অহা সপ্তাহত চীনৰ সৈতে পুনৰ আলোচনাত বহিব ভাৰত
পূৱ লাডাখত চীনৰ সেনাই আক্ৰমণ চলাই ২০ জনকৈ ভাৰতীয় সেনাৰ প্ৰাণ কাঢ়ি নিয়া ঘটনাৰ উত্তেজনা এতিয়াও মাৰ যোৱা নাই। চীনা সেনাৰ আক্ৰমণৰ বিৰুদ্ধে বিশ্ব জুৰি প্ৰতিক্ৰিয়া হোৱাৰ পৰিপ্ৰেক্ষিততে চীনে সীমান্তৰ পৰা সেনা আঁতৰাই নিবলৈ আৰম্ভ কৰিছিল যদিও এতিয়াও হাজাৰ হাজাৰ চীনা সেনাই সীমান্তত অৱস্থান গ্ৰহণ কৰি আছে।
এনে পৰিস্থিতিত চীনৰ সৈতে ভাৰতে পুনৰ অহা সপ্তাহত কামাণ্ডাৰ পৰ্যায়ৰ বৈঠকত অংশ গ্ৰহণ কৰিব।
ভাৰতীয় সেনাৰ শীৰ্ষ সূত্ৰই প্ৰকাশ কৰা অনুসৰি বৈঠকৰ দিন শীঘ্ৰে স্থিৰ কৰা হ’ব। চীনে লাডাখ সীমান্তৰ ফিংগাৰ ৪ৰ পৰা পূব দিশলৈ ফিংগাৰ ৫লৈ সেনা আঁতৰাই নিছে যদিও এতিয়াও ফিংগাৰ ৮ৰ পৰা সেনা আঁতৰ কৰা নাই।
ইয়াৰ ফলত এতিয়াও সীমান্তত উত্তেজনাই বিৰাজ কৰিছে।
চীনা সেনাই বহু বাহন ফিংগাৰ ৪ৰৰ পৰা আজিৰ দিনটোতো আঁতৰাই নিয়া দেখা গৈছে। উল্লেখ্য লাডাখ সংকটক লৈ চীনৰ সৈতে ভাৰতৰ এতিয়ালৈকে কামাণ্ডাৰ পৰ্যায়ৰ তিনি লানি আলোচনা হৈছে।
এই আলোচলাত ভাৰতৰ হৈ অংশগ্ৰহণ কৰিছে সেনাৰ শীর্ষ বিষয়া হৰিন্দৰ সিঙে। চীনৰ হৈ আলোচনাত ভাগ লৈছে লিউ লিনে।