ক্ৰমাগত পঞ্চম বাৰৰ বাবে দেশৰ স্বচ্ছ চহৰৰ তালিকাৰ শীৰ্ষত ইন্দোৰ
আজি ৰাষ্ট্ৰপতি ৰামনাথ কোবিন্দে ‘স্বচ্ছ সৰ্বেক্ষণ ২০২১’ বঁটা ঘোষণা কৰে। ইন্দোৰে পুনৰ ভাৰতৰ আটাইতকৈ পৰিষ্কাৰ চহৰ হিচাপে নিৰ্বাচিত হোৱাৰ বাবে এই বঁটা লাভ কৰিছে। একেৰাহে পঞ্চমবাৰৰ বাবে মধ্য প্ৰদেশৰ চহৰখনে এই বঁটা লাভ কৰিছে।
যোৱা বছৰ আটাইতকৈ পৰিষ্কাৰ চহৰৰ তালিকাত দ্বিতীয় স্থান দখল কৰা গুজৰাটৰ চুৰাটে এই বছৰো নিজৰ স্থান বজাই ৰাখিছে। ইফালে, অন্ধ্ৰপ্ৰদেশৰ বিজয়ৱাড়াই তালিকাত তৃতীয় স্থান দখল কৰিছে।
বাৰ্ষিক পৰিচ্ছন্নতা জৰীপত ছত্তীশগড়ক আটাইতকৈ পৰিষ্কাৰ ৰাজ্য হিচাপে চিহ্নিত কৰা হৈছে। আনহাতে উত্তৰ প্ৰদেশৰ বাৰাণসীয়ে স্বচ্ছ সৰ্বেক্ষণ ২০২১ ৰ বঁটাত আটাইতকৈ পৰিষ্কাৰ গংগা চহৰৰ মৰ্য্যদা লাভ কৰিছে।
টুইটাৰৰ জৰিয়তে কেন্দ্ৰীয় গৃহ আৰু নগৰ পৰিক্ৰমা মন্ত্ৰী হৰদীপ সিং পুৰীয়ে ইন্দোৰৰ জনসাধাৰণ, ৰাজনৈতিক নেতৃত্ব আৰু পৌৰ নিগমক অভিনন্দন জনাইছে।
Indore is India’s cleanest city for the 5th year in a row.
Heartiest congratulations to the people, political leadership, Municipal Corporation, Swachhagrahis & Safaimitras for their exemplary commitment towards keeping the city on top. @rashtrapatibhvn @ChouhanShivraj pic.twitter.com/ShLcbXkGzc— Hardeep Singh Puri (@HardeepSPuri) November 20, 2021
মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানেও ইন্দোৰৰ লোকসকলক এই সফলতাৰ বাবে অভিনন্দন জনাইছে।
এই বছৰৰ বাৰ্ষিক পৰিষ্কাৰ পৰিচ্ছন্নতা জৰীপত প্ৰায় ৩৪২ খন চহৰক কিছু তাৰকা ৰেটিং প্ৰদান কৰা হৈছিল। মুঠ ৪,৩২০ খন চহৰে এই জৰীপত অংশগ্ৰহণ কৰিছিল।
‘স্বচ্ছ সৰ্বেক্ষণ ২০২১’ বঁটা পৰিচালনা কৰা কেন্দ্ৰীয় গৃহ আৰু নগৰ পৰিক্ৰমা মন্ত্ৰালয়ে পূৰ্বে এক বিবৃতিত উল্লেখ কৰিছিল যে অনুষ্ঠানটোৰ ষষ্ঠ সংস্কৰণ বিশ্বৰ সৰ্ববৃহৎ নগৰ পৰিচ্ছন্নতা জৰীপ হৈ পৰিছে।