ভানুৰ আদৰ্শ|| পৰাজিত হ’লেও কামত সহায় কৰিব পল্লৱলোচনক [Video]

তেজপুৰ লোকসভা সমষ্টিত পৰাজয় স্বীকাৰ কৰি কংগ্ৰেছ প্ৰাৰ্থী এম জি ভি কে ভানুৱে ঘোষণা কৰিছে যে নিশ্চিত বিজয়ৰ দিশে আগবঢ়া পল্লৱ লোচন দাসৰ সাংসদ কাৰ্য্যকালত তেওঁ সকলো সহায় কৰিব।

নিশ্চিত বিজয়ী দাসলৈ শুভেচ্ছা জ্ঞাপন কৰি এক ফে’চবুক ভিডিঅ’যোগে ভানুৱে এই কথা সদৰী কৰিছে।

“তেজপুৰ সংসদীয় সমষ্টিৰ পৰা পল্লৱলোচন দাসক নিৰ্বাচিত হোৱাৰ বাবে তেওঁক মই শুভেচ্ছা জনাইছো। তেজপুৰ লোকসভা সমষ্টিৰ উন্নয়নৰ কাৰণে যি কাম-কাজ কৰিব সেই কাম-কাজত মই সহায়-সহযোগিতা আগবঢ়াম বুলি মই কৈছো,”  ভিডিঅ’যোগে ভানুৰ মন্তব্য।

গণতান্ত্ৰিক পৰাজয়ক স্বীকাৰ কৰি তেজপুৰ সমষ্টিৰ ৰাইজকো সাংসদ প্ৰাৰ্থীজনে ধন্যবাদ জ্ঞাপন কৰিছে।

“নিৰ্বাচনত হৰা-জিকা থাকেই। মনৰ পৰা কৈছো, আমি জিকিলেও হাৰিলেও ৰাইজে যি ৰায় দিছে, সেই ৰায়ৰ প্ৰতি সন্মান কৰো। জনতা জনাৰ্দন,” ভানুৰ মন্তব্য।

একেটা ভিদিঅ’তে নিৰ্বাচনত খটা সকলো কংগ্ৰেছ কৰ্মীকো অৱসৰপ্ৰাপ্ত আমোলাজনে ধন্যবাদ জ্ঞাপন কৰিছে।

নিজ দলৰ সকলো নেতা-কৰ্মীয়ে তেওঁক জয়ী কৰাবলৈ কৰা চেষ্টাৰ শলাগ লৈ ভানুৱে কয় যে যুৱ কংগ্ৰেছ, সেৱা কংগ্ৰেছ আৰু মহিলা কংগ্ৰেছকে ধৰি সকলো কংগ্ৰেছ নেতা-কৰ্মীয়ে বহুত কষ্ট কৰিছে।

https://www.facebook.com/MGVKBhanuOfficial/videos/312482026320320/

সমষ্টিটোৰ ভোটগণনাত ৰাতি ১০ বজালৈকে বিজেপি প্ৰাৰ্থী পল্লৱলোচন দাস ভানুতকৈ ২,৪০,৩৪৫টা ভোটত আগবাঢ়ি আছে।