ন্যায়পালিকাৰ ওপৰত অনাস্থা গণতন্ত্ৰৰ বাবে বিপজ্জনক কথা : মুখ্য ন্যায়াধীশ এনভি ৰমনা

আজি ভাৰতৰ মুখ্য ন্যায়াধীশ এন ভি ৰমনাই পুনৰ ন্যায় পালিকাকলৈ কেতবোৰ গুৰুত্বপূৰ্ণ মন্তব্য কৰে৷ বিজয়ৱাড়াত এক অনুষ্ঠানত উপস্থিত থাকি তেওঁ কয় যে যদি মানুহে ন্যায়পালিকাৰ ওপৰত বিশ্বাস হেৰুৱায়, তেন্তে গণতন্ত্ৰৰ অস্তিত্বলৈ বিপদ নামি আহিব। মুখ্য ন্যায়াধীশ ৰমনাই কয় যে মানুহে যাতে ন্যায়পালিকাৰ ওপৰত বিশ্বাস আৰু আস্থা হেৰুৱাব নোৱাৰে সেয়া নিশ্চিত কৰাটো প্ৰয়োজনীয় কথা।তেওঁ কয়” যদি ৰাইজে ন্যায়পালিকাৰ ওপৰত বিশ্বাস আৰু আস্থা হেৰুৱায় আৰু যদি ন্যায়পালিকাৰ পতন হয়, তেন্তে গণতন্ত্ৰৰ অস্তিত্ব বিপদত পৰিব,” ৷

অন্ধ্ৰপ্ৰদেশৰ মুখ্যমন্ত্ৰী ৱাই এছ জগন মোহন ৰেড্ডী, অন্ধ্ৰ প্ৰদেশ উচ্চ ন্যায়ালয়ৰ মুখ্য ন্যায়াধীশ প্ৰশান্ত কুমাৰ মিশ্ৰ, উচ্চ ন্যায়ালয় আৰু অন্যান্য আদালতৰ ন্যায়াধীশসকলৰ উপস্থিতিত ন্যায়াধীশ ৰমনাই বিজয়ৱাড়া আদালত চৌহদ উদ্বোধন কৰাৰ সময়তে এনেদৰে কয়। তেওঁ কয় যে মুখ্য ন্যায়াধীশ হিচাপে তেওঁৰ কাৰ্যকালত তেওঁ ন্যায়াধীশসকলৰ খালী পদ পূৰণৰ বিষয়ত গুৰুত্ব আৰোপ কৰিছিল আৰু উচ্চ ন্যায়ালয়ৰ প্ৰায় ২৫০ জন ন্যায়াধীশ নিযুক্ত কৰা হৈছে।

তেওঁ লগতে কয় যে ন্যায়াধীশসকলৰ খালী পদপূৰণ কৰা আৰু আন্তঃগাঁথনি উন্নত কৰাটো তেওঁৰ ডেৰ বছৰৰ কাৰ্যকালত কাৰ্যসূচীৰ শীৰ্ষত থকা দুটা বিষয় আছিল। তেওঁ কয় যে মুখ্য ন্যায়াধীশ হিচাপে তেওঁৰ কাৰ্যকালত উচ্চ ন্যায়ালয়ৰ ২৫০ জন ন্যায়াধীশ নিযুক্ত কৰা হৈছিল। উচ্চতম ন্যায়ালয়ৰ ১২ জন ন্যায়াধীশ আৰু বিভিন্ন ৰাজ্যিক উচ্চ ন্যায়ালয়ৰ ১৫ জন মুখ্য ন্যায়াধীশকো নিযুক্তি দিয়া হৈছে। ৰমানাই কয় যে তেওঁ সমাজৰ সকলো শ্ৰেণী, বিশেষকৈ মহিলা আৰু পিছপৰা শ্ৰেণীৰ লোকসকলে ন্যায়পালিকাত সঠিক প্ৰতিনিধিত্ব পোৱাটো নিশ্চিত কৰিব বিচাৰিছিল।

কিছুমান ৰাজ্যই সন্মুখীন হোৱা বিত্তীয় সমস্যাৰ প্ৰতি লক্ষ্য ৰাখি তেওঁ বিচাৰিছিল যে কেন্দ্ৰই আদালত ভৱন নিৰ্মাণৰ বাবে ৰাজ্যখনক পুঁজি যোগান ধৰিব লাগে।তেওঁ লগতে কয়” যদিও কেন্দ্ৰৰ কিছু বিৰোধিতা হৈছিল, কিছু মুখ্যমন্ত্ৰীয়ে, বিশেষকৈ পশ্চিম বংগ, অন্ধ্ৰ প্ৰদেশ আৰু তামিলনাডুৰ, মোক সমৰ্থন কৰিছিল আৰু কেন্দ্ৰক পুঁজি প্ৰদান কৰিবলৈ দাবী জনাইছিল। তেওঁলোকৰ সমৰ্থনৰ বাবে মই তেওঁলোকক ধন্যবাদ জনাইছো,”ন্যায়াধীশ ৰমনাই বিচাৰক আৰু অধিবক্তাসকলক সোঁৱৰাই দিয়ে যে দ্ৰুত ন্যায় নিশ্চিত কৰাটো তেওঁলোকৰ দায়িত্ব।

ন্যায়পালিকাৰ চূড়ান্ত লক্ষ্য হৈছে লোকসকলক ন্যায় প্ৰদান কৰা বুলি উল্লেখ কৰি তেওঁ অতি কম সময়ৰ ভিতৰতে দ্ৰুত ন্যায় নিশ্চিত কৰিবলৈ পৰামৰ্শ দিয়ে। ৰমানাই আজি ১৯৮৩ চনত বিজয়ৱাড়া বাৰ এছ’চিয়েশ্যনৰ সদস্য হিচাপে কাৰ্যনিৰ্বাহ কৰাৰ দিনবোৰো মনত পেলায়। তেওঁ কয়যে ন্যায়াধীশ কে জি শংকৰে তেওঁক হায়দৰাবাদলৈ যাবলৈ পৰামৰ্শ দিছিল। তেওঁ বিশিষ্ট অধিবক্তা আয়াপ্পু ৰেড্ডীৰ সৈতে তেওঁৰ সম্পৰ্কৰ কথাও স্মৰণ কৰে। তেওঁ সকলোকে সততাৰে কাম কৰি যাবলৈও আহ্বান জনায়৷