গোলাঘাট নগৰৰ ব্যৱসায়িক প্ৰতিষ্ঠানত ভয়ংকৰ অগ্নিকাণ্ড; লক্ষাধিক টকাৰ সম্পত্তি নষ্ট

গোলাঘাট নগৰৰ সদাব্যস্ত উপায়ুক্ত কাৰ্যালয় সমুখত থকা চিটি চিষ্টেম নামৰ ব্যৱসায়িক প্ৰতিষ্ঠানটোত দেওবাৰে নিশা প্ৰায় ১০ বজাত এক ভয়ংকৰ অগ্নিকাণ্ড সংঘটিত হয়।

উক্ত ঘটনাৰ ফলত অগ্নিকাণ্ড সূত্ৰপাত হোৱা য়াকুব আলী নামৰ লোকজনৰ ছপাকাম আৰু ষ্টেচনাৰী সামগ্ৰী বিক্ৰী কৰা প্ৰতিষ্ঠানটোৰ কেইবা লক্ষাধিক টকাৰ সামগ্ৰী ভস্মীভূত হয়। ইয়াৰ উপৰি প্ৰতিষ্ঠানটোৰ লগতে লাগি থকা বহুকেইগৰাকী অধিবক্তাৰ চেম্বাৰো জুইত কম বেছি পৰিমানে ক্ষতিগ্ৰস্ত হোৱা বুলি জানিব পৰা গৈছে।

অৱশ্যে স্থানীয় একাংশ লোকে দোকানখনৰ পৰা জুই আৰু ধোঁৱা নিৰ্গত হোৱা দেখি ততাতৈয়াকৈ অগ্নিনিৰ্বাপক বাহিনীক খবৰ দিয়াত অগ্নিনিৰ্বাপক বাহিনীৰ লোক ঘটনাস্থলীত উপস্থিত হৈ বহু সময় যুঁজি জুই নুমাবলৈ সক্ষম হয়।

কি কাৰণত উক্ত ঘটনাৰ সৃষ্টি হ’ল সেইয়া বাতৰি লিখা সময়লৈকে জানিব পৰা হোৱা নাই। উল্লেখযোগ্য যে য়াকুব আলীৰ উক্ত প্ৰতিষ্ঠানটোত প্ৰায় দুবছৰৰ পূৰ্বেও অগ্নিকাণ্ড সংঘটিত হৈ বহুকেইটা মূল্যবান ছপা মেচিন নষ্ট হৈছিল।