ভাৰতত অনুষ্ঠিত হ’বলগীয়া ক্ৰিকেট বিশ্বকাপ-২০২৩ৰ সূচী ঘোষণা; চাওক ভাৰতৰ খেলৰ সূচী

ভাৰতত অনুষ্ঠিত হ’বলগীয়া এদিনীয়া ক্ৰিকেট বিশ্বকাপ-২০২৩ৰ সূচী প্ৰকাশ কৰা হৈছে। ৫ অক্টোবৰৰ পৰা আৰম্ভ হ’ব বিশ্বকাপৰ যুঁজ। প্ৰথমখন মেচত যোৱাবাৰৰ চেম্পিয়ন ইংলেণ্ড ৰানাৰ্ছ আপ নিউজিলেণ্ডৰ মুখামুখি হ’ব। অহা ৮ অক্টোবৰৰ পৰা আৰম্ভ হ’ব ভাৰতৰ অভিযান।

ৰোহিত শৰ্মাৰ নেতৃত্বৰ ভাৰতৰ প্ৰথম প্ৰতিদ্বন্দ্বী অষ্ট্ৰেলিয়া। ১৯ নৱেম্বৰত অনুষ্ঠিত হ’ব মেগা টুৰ্ণামেণ্টৰ ফাইনেল।

লগতে পঢ়ক: প্ৰধানমন্ত্ৰী মোডীক প্ৰশ্ন কৰা সাংবাদিকক হাৰাশাস্তিৰ ঘটনাক গৰিহণা হোৱাইট হাউছৰ

প্ৰকাশ পোৱা সূচী অনুসৰি আহমেদাবাদত ভাৰত আৰু পাকিস্তান মুখামুখি হ’ব। ১৫ অক্টোবৰত মুখামুখি হ’ব চিৰ প্ৰতিদ্বন্দ্বী দল দুটা। ভাৰতৰ ৯খন চহৰত গ্ৰুপ পৰ্যায়ৰ খেল খেলিব টীম ইণ্ডিয়াই। অহা ৫ নৱেম্বৰত ইডেন গাৰ্ডেনত দক্ষিণ আফ্ৰিকাৰ বিৰুদ্ধে খেলিব ভাৰতে।

প্ৰতিযোগিতাখনৰ প্ৰথমখন খেল আহমেদাবাদৰ নৰেন্দ্ৰ মোডী ষ্টেডিয়ামত অনুষ্ঠিত হ’ব। ইংলেণ্ড বনাম নিউজিলেণ্ডৰ খেলৰ পৰা আৰম্ভ হ’ব এই প্ৰতিযোগিতা। বিশ্বকাপৰ ছেমি ফাইনেল দুখন মুম্বাই আৰু কলকাতাত অনুষ্ঠিত হ’ব। অন্তিম চাৰিখন খেল ক্ৰমে ৱানখেড়ে ষ্টেডিয়াম আৰু ইডেন গাৰ্ডেনত অনুষ্ঠিত হ’ব। অহা ১৫ আৰু ১৬ নৱেম্বৰত অনুষ্ঠিত হ’ব ছেমি ফাইনেল খেল। ১৯ নৱেম্বৰত নৰেন্দ্ৰ মোডী ষ্টেডিয়ামত বিশ্বকাপৰ ফাইনেল হ’ব।

লগতে পঢ়ক: চিকিৎসা বিভ্ৰাট! জিভাৰ সলনি পুৰুষাংগৰ অস্ত্ৰোপচাৰ; বাতিল চিকিৎসালয়ৰ অনুজ্ঞাপত্ৰ

মঙলবাৰে মুম্বাইত প্ৰকাশ পালে পৰৱৰ্তী এদিনীয়া বিশ্বকাপৰ সূচী। ইতিমধ্যে ভাৰতকে ধৰি ৮টা দলে বিশ্বকাপৰ বাবে যোগ্যতা অৰ্জন কৰিছে। কোৱালিফায়াৰত জয়লাভ কৰি আৰু দুটা দলে এই প্ৰতিযোগিতাত অংশগ্ৰহণ কৰিব। পাকিস্তান ক্ৰিকেট ব’ৰ্ডৰ দাবী মানি তেওঁলোকৰ মেচৰ স্থান সলনি কৰিব নেকি সেইটো লক্ষ্য কৰা হৈছিল যদিও শেষত আহমেদাবাদতে আয়োজন কৰিবলৈ লোৱা হৈছে ভাৰত-পাক মেচ।

বিশ্বকাপ-২০২৩ৰ ভাৰতৰ খেলৰ সূচী

ভাৰত বনাম অষ্ট্ৰেলিয়া : ৮ অক্টোবৰ, চেন্নাই

ভাৰত বনাম আফগানিস্তান: ১১ অক্টোবৰ, দিল্লী

ভাৰত বনাম পাকিস্তান: ১৫ অক্টোবৰ, আহমেদাবাদ

ভাৰত বনাম বাংলাদেশ : ১৯ অক্টোবৰ, পুনে

ভাৰত বনাম নিউজিলেণ্ড: ২২ অক্টোবৰ, ধৰ্মশালা

ভাৰত বনাম ইংলেণ্ড: ২৯ অক্টোবৰ, লক্ষ্ণৌ

ভাৰত বনাম কোৱালিফায়াৰ : ২ নৱেম্বৰ, মুম্বাই

ভাৰত বনাম দক্ষিণ আফ্ৰিকা: ৫ নৱেম্বৰ, কলকাতা

ভাৰত বনাম কোৱালিফায়াৰ : ১১ নৱেম্বৰ, বেংগালুৰু।