মেঘালয়ৰ তিনিটা পৰ্যটনস্থলী পুনৰ মুকলি কৰাৰ সিদ্ধান্ত চৰকাৰৰ

মহামাৰী ক’ভিড-১৯ৰ বাবে দীৰ্ঘদিন ধৰি বন্ধ হৈ থকা মেঘালয়ৰ তিনিটা পৰ্যটনস্থলী ১ ছেপ্তেম্বৰৰ পৰা পুনৰ মুকলি কৰাৰ সিদ্ধান্ত লৈছে ৰাজ্য চৰকাৰে।

পৰ্যটনস্থলী তিনিটা মুকলি কৰাৰ সিদ্ধান্ত ল’লেও স্থান তিনিটা কেৱল মাত্ৰ স্থানীয় পৰ্যটকৰ বাবেহে বুলি মেঘালয় চৰকাৰে জনায়।

স্থানীয় পৰ্যটকৰ বাবে মুকলি কৰি দিবলগীয়া স্থান তিনিটা হৈছে- এলিফেণ্ট ফলছ, ৱাৰ্ডছ লেক আৰু লাম নেহৰু পাৰ্ক। এই তিনিওটা স্থানত ক’ভিড-১৯ৰ সম্পূৰ্ণ ৰীতি-নিয়ম মানি চলিব লাগিব।

সাধাৰণ ৰাইজৰ বাবে স্থান তিনিটা মুকলি কৰি দিয়াৰ সন্দৰ্ভত চৰকাৰে যোৱা শুকুৰবাৰে সিদ্ধান্ত গ্ৰহণ কৰে।

কেবিনেট মন্ত্ৰী এল হেকে এই সন্দৰ্ভত কয় যে পৰ্যটন ক্ষেত্ৰখনক এটা সুবিধা দিয়াটো প্ৰয়োজনীয়। এই ঠাই সমূহত সামাজিক দূৰত্বৰ লগতে সকলো নীতি-নিয়ম মানি চলিব লাগিব বুলিও মন্ত্ৰীজনে উল্লেখ কৰিছে।

মেঘালয় মুখ্য মন্ত্ৰী কনৰাড চাংমাই টুইটযোগে কয়, ‍‘অহা ১ ছেপ্তেম্বৰৰ পৰা স্থানীয় পৰ্যটকৰ বাবে ৱাৰ্ডছ লেক, লাম নেহৰু পাৰ্ক আৰু এলিফেণ্ট ফলছ মুকলি কৰাৰ বাবে চৰকাৰে সিদ্ধান্ত লৈছে’।

উল্লেখ্য যে মেঘালয়ৰ অৰ্থনৈতিক খণ্ডৰ বাবে অতিকৈ গুৰুত্বপূৰ্ণ পৰ্যটন ক্ষেত্ৰখন মহামাৰী ক’ভিড-১৯-এ বেয়াকৈ ক্ষতিগ্ৰস্ত কৰিছে।