ভাৰতত প্ৰথম পৰ্যায়ৰ ল’কডাউনত ১২ কোটি লোকে কাম হেৰুৱাইছে; কংগ্ৰেছ সভানেত্ৰী ছোনিয়া গান্ধীৰ সমালোচনা
ক’ৰ’না ভাইৰাছৰ সংক্ৰমণৰ বাবে প্ৰধান মন্ত্ৰী নৰেন্দ্ৰ মোদীয়ে সমগ্ৰ দেশত ২৫ মাৰ্চৰ পৰা ১৪ এপ্ৰিললৈ ঘোষণা কৰা প্ৰথম পৰ্যায়ৰ ল’কডাউনৰ সময়ত ভাৰতত ১২ কোটি লোকে কাম হেৰুৱাইছে বুলি অভিযোগ উত্থাপন কৰিছে ছোনিয়া গান্ধীয়ে।
কংগ্ৰেছ ৱৰ্কিং কমিটিৰ ভিডিঅ’ কনফাৰেঞ্চৰ সহায়ত অনুষ্ঠিত হোৱা বৈঠকৰ সময়ত এই অভিযোগ কৰে কংগ্ৰেছৰ ৰাষ্ট্ৰীয় সভানেত্ৰী গান্ধীয়ে।
‘‘অৰ্থনৈতিক কাম-কাজ বন্ধ হৈ থকা বাবে ভবিষ্যতে নিবনুৱা সমস্যা আৰু অধিক বৃদ্ধি হ’ব। ব্যৱসায়, বাণিজ্য আৰু উদ্যোগ ব্যৱস্থালৈ সংকট নামি আহিছে আৰু কোটি কোটি পৰিয়াল ধ্বংস হৈ যাব,’’ ছোনিয়া গান্ধীয়ে লগতে কয়।
আনহাতে, কংগ্ৰেছ সভানেত্ৰী গৰাকীয়ে ভাৰত চৰকাৰে কম সংখ্যক লোকৰ ক’ৰ’না পৰীক্ষা কৰিছে বুলি উল্লেখ কৰি অধিক সংখ্যক টেষ্টিং আৰু কন্টাক ট্ৰেছিঙৰ দ্বাৰাহে ক’ৰ’নাৰ সংক্ৰমণ ৰোধ কৰা সম্ভৱ হ’ব বুলি মত প্ৰকাশ কৰে।
উল্লেখযোগ্য যে, কংগ্ৰেছৰ ৰাহুল গান্ধীকে ধৰি প্ৰায় সংখ্যক নেতাই প্ৰথমৰে পৰা ভাৰতে ক’ৰ’নাৰ পৰীক্ষা কমকৈ কৰা বুলি সমালোচনা কৰি আহিছে।
আই চি এম আৰে সংবাদমেলত ভাৰতে প্ৰতিগৰাকী ক’ৰ’না আক্ৰান্তৰ বিপৰীতে ২১ গৰাকী লোকৰ পৰীক্ষা সম্পন্ন কৰা বুলি তথ্য দাঙি ধৰি এই সংখ্যা আমেৰিকা, জাপান, ইটালী আদি দেশতকৈ উন্নত বুলি কয়।