লণ্ডনত বৰ্ণাঢ্য কাৰ্য্যসুচীৰে ভাৰতৰত্ন ড° ভূপেন হাজৰিকাৰ সংগীত দিবস পালন

লণ্ডনৰ শ্ৰীমন্ত শঙ্কৰদেৱ আন্তৰ্জাতিক সাংস্কৃতিক কেন্দ্ৰই যোৱা শনিবাৰে ভাৰতৰত্ন ড° ভূপেন হাজৰিকাৰ পঞ্চবাৰ্ষিকী সংগীত দিবস বিভিন্ন কাৰ্য্যসুচীৰে পালন কৰে।

হীৰামনি শৰ্মাই আঁত ধৰা এই অনুষ্ঠানটোৰ আৰাম্ভণিতে সাংস্কৃতিক কেন্দ্ৰটোৰ উদ্যোক্তা ডাঃ কৰুণা সাগৰ দাসে উপস্থিত সকলোকে আন্তৰিক অভিনন্দন জ্ঞাপন কৰে।

তেওঁ মৰণোত্তৰভাবে হ’লেও ড° ভূপেন হাজৰিকাই ভাৰতবৰ্ষৰ এই সৰ্বোচ্চ সন্মান “ভাৰতৰত্ন” পোৱাৰ বাবে আনন্দ প্ৰকাশ কৰে।

ইয়াৰ পাছতেই ড° নীৰা বৰকাকতিয়ে সুধাকণ্ঠৰ জীৱন দৰ্শন,কৰ্ম্ম তথা তেওঁৰ সময়হীন সৃষ্টিৰাজিৰ ওপৰত আলোকপাত কৰে।

অসমৰ পৰা লণ্ডন ভ্ৰমণৰ উদ্যেশ্যে সপৰিয়ালে লণ্ডনত উপস্থিত হোৱা জ্যেষ্ঠ আৰক্ষী বিষয়া,অসম আৰক্ষীৰ উপ-মহাপৰিদৰ্শক তথা সুগায়ক ড°শ্যামল প্ৰসাদ শইকীয়াই মহাপুৰুষ শ্ৰীমন্ত শঙ্কৰ দেৱ বিৰচিত ‘এ জয় ৰঘুৰ নন্দন এ ৰাঘব …’ বৰগীতটিৰে সাংস্কৃতিক অনুষ্ঠানটোৰ শুভাৰাম্ভণি কৰি সুধাকণ্ঠৰ কেইবাটাও কালজয়ী গীত পৰিবেশন কৰে।

ইয়াৰ উপৰি ডাঃ নীলমনি চিকদাৰ, ড° স্পন্দিতা গোস্বামী,দেবলীন দাস ,উদেশমান গোস্বামী,আৰাইকি আলোমিয়ান (AryakiAlomyan), অংকিতা ধাছমানা, ডাঃ ইফটিকাৰ হুছেইন, মামনি শৰ্মা, জিমান্ত বৰা, চৈয়দ নূৰ ফাৰনাজ,পাৰ্থ বৰবৰা,জয়ন্ত ৰয়ৰ সংগীত পৰিবেশনে উপস্থিত ৰাইজক আনন্দিত কৰে।

অনুষ্ঠানত চিনু কিশোৰৰ গজ গামিনী আৰু অসমৰ এন ই এফ আইন মহাবিদ্যালয়ৰ তৃতীয় ষান্মাষিকৰ ছাত্ৰী কামাক্ষী শইকীয়াই সুধাকণ্ঠৰ “বিস্তীৰ্ণ পাৰৰে অসংখ্য জনৰে…” গীতটিৰ ওপৰত কৰা নৃত্যশৈলীৰ প্ৰদৰ্শনে সকলোকে মুগ্ধ কৰি তোলে।

অনুষ্ঠানটোত প্ৰবাসী অসমীয়া, অন্যান্য ভাৰতীয় লোকৰ উপৰিও বৃটেইন আৰু য়ুৰোপৰো কিছু সংখ্যক ব্যক্তি উপস্থিত থাকি ড° ভূপেন হাজৰিকাৰ গীতবোৰ শুনি অভিভূত হৈ পৰে।

অনুষ্ঠানত উপস্থিত থাকি সৰ্বতোপ্ৰকাৰে আকুন্ঠ সহায় সহযোগিতা আগবঢ়োৱা সকলোলৈকে ডাঃ পল্লব দাসে ধন্যবাদ জনায়।