সংখ্যালঘু ছাত্ৰ-ছাত্রীৰ জলপানিৰ নামত বৃহৎ বিত্তীয় কেলেংকাৰি; এজনক গ্ৰেপ্তাৰ

যোৱা বছৰৰ দৰে এই বছৰো সংখ্যালঘু ছাত্ৰ-ছাত্রীৰ জলপানিৰ ধনৰ নামত নগাঁও জিলাত সংঘটিত হৈছে বৃহৎ বিত্তীয় কেলেংকাৰি। এই তথ্য পোহৰলৈ আহিছে নগাঁও আৰক্ষীৰ অনুসন্ধানত।

ইতিমধ্যে আৰক্ষীয়ে জুৰীয়া থানাত ৩৫০/১৯ নম্বৰত ভাৰতীয় দণ্ডবিধিৰ কেইবাটাও ধাৰাত গোচৰ ৰুজু কৰি ঘটনা সন্দৰ্ভত ক্ষীপ্ৰতাৰে তদন্ত আৰম্ভ কৰিছে।

এই গোচৰৰ ভিত্তিত আৰক্ষীয়ে যোৱা দেওবাৰে নিশা জুৰীয়া সোনাইবেৰাৰ ছাহজাহান আলী নামৰ এজন লোকক আটক কৰিছিল। আৰক্ষীৰ জেৰাত লোকজনে বহু তথ্য ফাদিল কৰাত সোমবাৰে তেওঁক গ্ৰেপ্তাৰ কৰা হয়।

জানিব পৰা মতে এই বৃহৎ বিত্তীয় কেলেংকাৰিৰ সৈতে লোকজন প্ৰত্যক্ষভাৱে জড়িত থকাৰ উপৰি তেওঁৰ স্বীকাৰোক্তিৰ ভিত্তিত আৰক্ষীয়ে আৰু দুজন লোকৰ ঘৰত অভিযান চলাই বহু আপত্তিজনক নথি-পত্ৰ জব্দ কৰিছে।

এই চক্ৰটোৱে কেৱল নগাঁও জিলাতে নহয় সমগ্ৰ ৰাজ্যতে এনেধৰণৰ ঘটনা সংঘটিত কৰিবলৈ এক বৃহৎ নেটৱৰ্ক গঢ়ি তোলা বুলি সন্দেহ প্ৰকাশ কৰিছে তদন্তকাৰী আৰক্ষীয়ে।

আৰক্ষীয়ে প্ৰকাশ কৰা অনুসৰি গ্ৰামীণ বিকাশ বেংক আৰু য়ু বি আই বেংকৰ একাংশ গ্ৰাহক সেৱা কেন্দ্ৰৰ অধীনত থকা একাউণ্টতহে বিশেষকৈ এই কেলেংকাৰি সংঘটিত হৈছে। এই কেলংকাৰিত বেংকৰ চি এছ পি জৰিত থকাৰ সন্দেহ আৰক্ষীৰ।

প্ৰকৃত সংখ্যালঘু ছাত্ৰ-ছাত্ৰীক জলপানিৰ পৰা বঞ্চিত কৰি ভুৱা ছাত্ৰ-ছাত্ৰী দেখুৱাই কোটিটকীয়া কেলেংকাৰি সংঘটিত কৰা চক্ৰটোক বিচাৰি উলিয়াবলৈ নগাঁও জিলাৰ আৰক্ষী অধীক্ষক শংকৰব্ৰত ৰায় মেধিয়ে এক বিশেষ তদন্তকাৰী দল গঠন কৰিছে।