ৰাম মন্দিৰ নিৰ্মাণত নৰেন্দ্ৰ মোদীৰ একো অৰিহনা নাই : কাৰণ দৰ্শাই আৰ.পি. শৰ্মাৰ বহু বিস্ফোৰক মন্তব্য

কাইলৈ অযোধ্যাত হ’ব ঐতিহাসিক ৰাম মন্দিৰৰ ভূমিপূজন। প্ৰধানমন্ত্ৰী নৰেন্দ্ৰ মোদী এই ভূমিপূজন অনুষ্ঠানৰ মুখ্য অতিথি হিচাপে থাকিব।

তেনে সময়তে মোদীৰ বিৰুদ্ধে সৰৱ হৈ কেতবোৰ বিস্ফোৰক মন্তব্য কৰিছে প্ৰাক্তন বিজেপি সাংসদ তথা বৰ্তমানৰ কংগ্ৰেছী ৰাম প্ৰসাদ শৰ্মাই।

প্ৰধান মন্ত্ৰী নৰেন্দ্ৰ মোদীৰ ৰাম মন্দিৰ নিৰ্মাণত কোনোধৰণৰ অৰিহণা নাই বুলি আৰ. পি শৰ্মাই দাবী কৰাৰ লগতে মোদীৰ সলনি এই অনুষ্ঠানৰ মুখ্য অতিথি হিচাপে প্ৰাক্তন উপ-প্ৰধানমন্ত্ৰী তথা প্ৰবীণ বিজেপি নেতা লাল কৃষ্ণ আদৱানিক নিমন্ত্ৰণ দিব লাগিছিল বুলি সদৰি কৰে।

নৰ্থ ইষ্ট নাওৰ সাংবাদিকৰ সৈতে হোৱা টেলিফোনিক বাৰ্তালাপত শৰ্মাই কয় ‘ভূমিপূজন অনুষ্ঠানত মুখ্য অতিথি হ’ব লাগিছিল লালকৃষ্ণ আদৱানি। তেওঁৰ হাতৰেহে ভূমিপূজন আৰম্ভ কৰিব লাগিছিল।ৰাম মন্দিৰ নিৰ্মাণত নৰেন্দ্ৰ মোদীৰ একো অৰিহণা নাই। তেওঁ ১৯৯২ চনত হোৱা ৰথযাত্ৰাত লাল কৃষ্ণ আদৱানিৰ ৰথত আহিছিল। তেওঁৰ কোনো কৃতিত্ব নাই।‘

ইপিনে, নৰেন্দ্ৰ মোদীৰ অৰিহণা অথবা কৃতিত্ব নথকাৰ কাৰণ বাখ্যা কৰে আৰ পি শৰ্মাই।

তেওঁ প্ৰথমটো কাৰণ বাখ্যা কৰি কয় ‘ভূমিপূজনৰ মূল হৰ্তাকৰ্তা হ’ব লাগিছিল বেলেগ কেইগৰাকীমান ব্যক্তি। নৰেন্দ্ৰ মোদী বিশেষ নহয়। এল কে আদোৱানি, তাহানিৰ উত্তৰ প্ৰদেশৰ মুখ্য মন্ত্ৰী কল্যাণ সিং, উমা ভাৰতী আৰু মনোহৰ যোশীহে হৰ্তা-কৰ্তা হ’ব লাগিছিল।’

দ্বিতীয়তে তেওঁ কয় ‘প্ৰায় ৭০ বছৰ ধৰি আদালতত গোচৰ চলি আছিল। সেই গোচৰ চলি অৱশেষত উচ্চতম ন্যায়ালয়ে ৰায় দিলে। পুৰাতত্ব বিভাগৰ প্ৰতিবেদন, সাক্ষীবাদী লৈ উচ্চতম ন্যায়ালয়ে ৰায়দান দিলে। এইটো এটা ন্যায়িক সিদ্ধান্ত হয়। এইক্ষেত্ৰত নৰেন্দ্ৰ মোদী চৰকাৰৰ কোনো ধৰণৰ অৰিহণা নাই।‘

তাৎপৰ্যপূৰ্ণভাৱে ৰাম মন্দিৰ নিৰ্মাণৰ ক্ষেত্ৰত আওপকীয়াকৈ হ’লেও কংগ্ৰেছৰ কৃতিত্ব থকা বুলি শৰ্মাই দাবী কৰে।

তেওঁ কয় ‘এইবাৰ দ্বিতীয়বাৰলৈ ভূমিপূজন হ’ব। ৰাম মন্দিৰৰ ভূমিপূজন ১৯৮৯ চনতে এবাৰ হৈছিল। ১৯৮৬ চনত মন্দিৰটো নিৰ্মাণ কৰি দিছিল তেতিয়াৰ প্ৰধান মন্ত্ৰী ৰাজীৱ গান্ধীয়ে। ১৯৪৯ চনত জৱাহৰলাল নেহৰু প্ৰধান মন্ত্ৰী হৈ থকাৰ সময়ত ৰামৰ মূৰ্তি স্থাপন কৰা হৈছিল।‘

ইপিনে, বিজেপিয়ে কংগ্ৰেছৰ দিনৰ কামবোৰৰ নিজেই কৃতিত্ব ল’বলৈ বিচাৰে বুলি অভিযোগ তুলি শৰ্মাই কয়, ‘বিজেপিৰ এতিয়া ‘আমি অকলে খাম, অকলে সকলো কৰিম’ অৱস্থা হৈছে। শদিয়াৰ ধলা-শদিয়া দলং কংগ্ৰেছে বনালে আৰু বিজেপিয়ে উন্মোচন কৰি বিজেপিয়ে বনোৱা বুলি প্ৰচাৰ চলালে।‘

আনহাতে, ৰাম মন্দিৰৰ ভূমিপূজন ক’ৰ’ণা কাল যোৱাৰ পাছতহে হ’ব লাগিছিল বুলি উল্লেখ কৰি শৰ্মাই কয় ‘জ্যোতিষীসকলেও কৈ আছে এতিয়া ভদ্ৰকাল চলি আছে, সময়ো বেয়া গতিকে আধাৰশিলা স্থাপন কৰিব নালাগে।‘