ভাৰতলৈ কি বাৰ্তা নেপালৰ? ৰাম মন্দিৰ নিৰ্মাণ কৰিব নেপালৰ প্ৰধান মন্ত্ৰী কমিউনিষ্ট অ’লিয়ে!

ভাৰতৰ সৈতে দ্বিপাক্ষিক সম্পৰ্কৰ অৱনতিক লৈ চিন্তিত নহয় নেপাল! আপাতত: দেশখনৰ শেহতীয়া স্থিতিক লৈ তেনেকুৱাই দেখা গৈছে।

নেপালৰ প্ৰধান মন্ত্ৰী কে পি শৰ্মা অ’লিয়ে ভাৰতৰ অযোধ্যাত হিন্দুসকলৰ আৰাধ্য প্ৰভু ৰামৰ জন্ম অযোধ্যাত নহয় বুলি কৈছে।

তেওঁৰ ৰামৰ জন্ম নেপালৰ চিতৱানৰ মাদিৰ অন্তৰ্গত অযোধ্যাপুৰীত বুলিহে দাবী কৰিছে। সেয়াই নহয়, তেওঁ তাত এটা ৰাম মন্দিৰ নিৰ্মাণৰ কথাও কৈছে।

প্ৰধান মন্ত্ৰী গৰাকীয়ে নেপালৰ জনতাক অযোধ্যাপুৰীত যে ৰামৰ জন্ম হৈছিল তাক প্ৰচাৰ কৰাৰো আহ্বান জনাইছে।

বাতৰি অনুসৰি, শনিবাৰে মাদি পৌৰসভাৰ মেয়ৰৰ নেতৃত্বত অহা এটা প্ৰতিনিধি দলৰ সৈতে প্ৰধান মন্ত্ৰী অ’লিয়ে এক দীঘলীয়া বৈঠকত ভাগ লয়।

সূত্ৰ অনুসৰি, প্ৰধান মন্ত্ৰী অ’লিয়ে কয় যে ভাৰতৰ উত্তৰ প্ৰদেশত নহয়, নেপালৰ অযোধ্যাপুৰীতহে ৰামৰ জন্ম। আমাৰ হাতত থকা প্ৰমানসমূহৰ পৰা ক’ব পাৰি যে নেপালৰ অযোধ্যাপুৰীতে ৰামৰ জন্ম হৈছিল।

বাতৰি অনুসৰি, মাদি পৌৰসভাৰ এগৰাকী ৱাৰ্ড অধ্যক্ষয়ো প্ৰধান মন্ত্ৰীৰ কথাক সমৰ্থন কৰি কয় যে অযোধ্যাপুৰীৰ পাৰসাৰ থৰি অঞ্চলত থকা বাল্মিকী আশ্ৰমতে ৰামৰ জন্ম হৈছিল।

ইয়াৰ পাছতে প্ৰধান মন্ত্ৰীগৰাকীয়ে প্ৰতিনিধি দলটোক অযোধ্যাপুৰীৰ চৌপাশৰ অঞ্চল সংৰক্ষণৰ বাবে নিৰ্দেশ দিয়াৰ লগতে আৰু অধিক তথ্য সংগ্ৰহৰ বাবে খনন কাৰ্য চলাবলৈয়ো কৈছে।

প্ৰধান মন্ত্ৰীগৰাকীয়ে অযোধ্যাপুৰীক ঐতিহাসিক তথা ধৰ্মীয় তীৰ্থস্থান হিচাপে গঢ়ি তোলাৰ বাবে চৰকাৰে ভূমি প্ৰদান কৰিব বুলি জানিব দি লগতে ৰাম, লক্ষ্মণ আৰু সীতাৰ মূৰ্তি স্থাপনৰ নিৰ্দেশ দিছে।

শেহতীয়াভাৱে ভাৰতৰ অযোধ্যাত ৰাম মন্দিৰ নিৰ্মাণৰ বাবে প্ৰধান মন্ত্ৰী নৰেন্দ্ৰ মোদীয়ে ভূমি পূজন কৰাৰ পাছতে নেপালৰ প্ৰধান মন্ত্ৰীগৰাকীয়ে বিষয়টোক লৈ আৰু অধিক তৎপৰতা প্ৰদৰ্শন কৰিছে।

কূটনৈতিক মহলৰ মতে চীনৰ উচটনিতে নেপালে ভাৰতৰ বিৰুদ্ধে বিভিন্ন ধৰণে চাপ সৃষ্টি কৰাৰ চেষ্টা অব্যাহত ৰাখিছে আৰু হঠাতে ভগৱান ৰামক লৈ আৰম্ভ কৰা এই বিতৰ্কিত কছৰৎ তাৰেই এক অংশ।

বহুতেই ক’ব খোজে যে কমিউনিষ্ট চীনৰ প্ৰৰোচনাতে নেপালৰ প্ৰধান মন্ত্ৰী কমিউনিষ্ট কে পি শৰ্মা অ’লিয়ে ৰাম মূৰ্তি নিৰ্মাণৰ দৰে প্ৰসংগ টানি আনিছে।