পুনৰ উলংগ হ’ল অসমীয়া যুৱক : বিধেয়কৰ বিৰুদ্ধে এইবাৰ প্ৰতিবাদ দিচপুৰত
নাগৰিকত্ব সংশোধনী বিধেয়ক ২০১৬ বাতিলৰ দাবীত দিচপুৰ সচিবালয়ৰ সন্মুখত আজি পুনৰ উলংগ হ’ল অসমীয়া যুৱক। এজন যুৱক সম্পূৰ্ণ উলংগ হোৱাৰ উপৰিও আন তিনিজন যুৱকে অন্তৰ্বাস পৰিধান কৰি প্ৰতিবাদ সাৱ্যস্ত কৰে। আজি পুৱা ১০ বাজি ২০ মিনিটত সচিবালয়ৰ সন্মুখত হঠাৎ উলংগ হৈ যুৱক কেইজনে এই প্ৰতিবাদ সাৱ্যস্ত কৰে।
পূৰ্বৰে পৰা সষ্টম হৈ থকা আৰক্ষী বাহিনীয়ে লগে লগে চাৰিগৰাকী উলংগ প্ৰতিবাদকাৰীক কম্বলেৰে মেৰিয়াই গ্ৰেপ্তাৰ কৰি খানাপাৰালৈ লৈ যায়। আৰক্ষীয়ে প্ৰতিবাদকাৰীসকলৰ প্ৰতিবাদ কৰাত সম্পূৰ্ণৰূপে বাধা আৰোপ কৰে।
উল্লেখযোগ্য যে সম্ভাৱ্য প্ৰতিবাদৰ প্ৰতি লক্ষ্য ৰাখি আগতীয়াকৈ সচিবালয়ৰ সন্মুখত গঢ়ি তোলা হৈছিল কটকটীয়াকৈ নিৰাপত্তা বেষ্টনী।
জানিব পৰা মতে, প্ৰতিবাদকাৰী সকলৰ নাম ক্ৰমে সোণাৰাম দাস, হৰকান্ত দাস বুবুল ডেকা আৰু নৰেন কাকতি। প্ৰতিবাদকাৰী কেইজনে ‘নাগৰিকত্ব সংশোধনী বিধেয়ক বাতিল কৰক’, ‘কেন্দ্ৰীয় চৰকাৰ হায় হায়’, ‘সৰ্বানন্দ সোণোৱাল গ’ বেক’ ধ্বনি দিয়ে।
উলংগ হোৱা প্ৰতিবাদকাৰী কেইজনে ‘জাগিলে অসম বাচিব দেশ’ পোষ্টাৰ লৈ প্ৰতিবাদ কৰিছিল।
আনহাতে, সম্পূৰ্ণ উলংগ হৈ প্ৰতিবাদ কৰা যুৱকজনৰ নাম নৰেন কাকতি বুলি জানিব পৰা গৈছে।
উল্লেখ্য যে জাতিধ্বংসী নাগৰিকত্ব সংশোধনী বিধেয়কৰ বিৰুদ্ধে কৃষক মুক্তি সংগ্ৰাম সমিতিকে ধৰি কেইবাটাও সংগঠনৰ প্ৰতিনিধিয়ে যোৱা ৭ জানুৱাৰিত নতুন দিল্লীৰ সংসদ ভৱনৰ সমীপতো উলংগ হৈ প্ৰতিবাদ সাৱ্যস্ত কৰিছিল।