বাজেট নহয় এইখন হিতাধিকাৰী আঁচনি : সোণোৱাল চৰকাৰক কঠোৰ সমালোচনা বিৰোধীৰ

ৰাজ্যৰ বিত্ত মন্ত্ৰী হিমন্ত বিশ্ব শৰ্মাই কালি অসম বিধানসভাৰ মজিয়াত দাখিল কৰা সৰ্বানন্দ সোণোৱাল চৰকাৰৰ কাৰ্য্যকালৰ অন্তিমখন পূৰ্ণাংগ বাজেটক ৰাইজক ভিক্ষাৰী সজোৱা বাজেট আখ্যা দিছে এ আই য়ু ডি এফে।

হিমন্ত বিশ্ব শৰ্মাই বাজেট দাখিল কৰা থকা সময়তে সদন বিধানসভা ত্যাগ কৰা কংগ্ৰেছ দলৰ দলপতি দেবব্ৰত শইকীয়াই চৰকাৰক সমালোচনা কৰি ২০২০-২১ বৰ্ষৰ বাজেটক বক্তৃতাৰ ফুলজাৰি মৰা এখন বাজেট বুলি কয়।

আনহাতে, প্ৰাক্তন মুখ্য মন্ত্ৰী তৰুণ গগৈ হিমন্ত বিশ্বই দাখিল কৰা বাজেটখনক সোণোৱাল চৰকাৰৰ নিকৃষ্ট বাজেট হিচাপে অভিহিত কৰিছে।

বিধানসভাত বাজেট দাখিল কৰাৰ আগেয়ে ইণ্টাৰনেটত বাজেট ভাইৰেল হৈ পৰা প্ৰসংগত মত প্ৰকাশ কৰি তৰুণ গগৈয়ে ভাৰতৰ ভিতৰত এনেধৰণৰ কথা প্ৰথম সংঘটিত হৈছে বুলি সমালোচনা কৰে।

এ আই য়ু ডি এফে এইখন বাজেটৰ পৰিৱৰ্তে হিতাধিকাৰী আঁচনিহে হৈছে বুলিও চৰকাৰক সমালোচনা কৰে।

তদুপৰি নিৰ্বাচনৰ আগে আগে ফ্ৰী বিজুলী, পিংক বাছ সেৱা আদিৰ দৰে চমক সৃষ্টিকাৰী ঘোষণাৰে বিজেপিয়ে পুনৰ ক্ষমতালৈ অহাৰ সপোন দেখিছে বুলিও বিৰোধীয়ে চৰকাৰক সমালোচনা কৰে।