জি বিদাই অবিহনে এন ডি এফ বিৰে শান্তি আলোচনা “অসমাপ্ত”!

এন ডি এফ বিৰ সৈতে নতুন দিল্লীয়ে কৰিব খোজা শান্তিচুক্তি “অসমাপ্ত” হৈ ৰ’ব, যদিহে চুক্তিৰ পৰা দুৰ্ধৰ্ষ বিদ্ৰোহী জি বিদাইক আঁতৰাই ৰখা হয়।

জানিব পৰা মতে, গৃহ মন্ত্ৰ্যালয়ে শান্তিচুক্তিৰ বাবে এখন খচৰা প্ৰস্তুত কৰি আছে, য’ত সশস্ত্ৰ বিদ্ৰোহী সংগঠনটোৰ তিনিটা গোটক (faction) জড়িত কৰা হৈছে।

শেহতীয়া অগ্ৰগতি হ’ল, এন ডি এফ বিৰ চাওৰাইগৱৰা গোটটোৱে হিংসা পৰিহাৰ কৰি শান্তি প্ৰক্ৰিয়াত যোগ দিয়াৰ সিদ্ধান্ত লৈছে।

গোটটোৰ অধ্যক্ষ বি চাওৰাইগৱৰাই গৃহ মন্ত্ৰ্যালয়ৰ জ্যেষ্ঠ বিষয়াক লগ কৰি আলোচনা আৰম্ভ কৰিবলৈ ইতিমধ্যে নতুন দিল্লীলৈ ৰাওনা হৈছে।

এটা সূত্ৰৰ পৰা জানিব পৰা গৈছে এন ডি এফ বিৰ চাওৰাইগৱৰা গোটৰ প্ৰায় ৫০জনীয়া সদস্যৰ এটা দল ম্যানমাৰৰ পৰা আহি ইতিমধ্যে অসমত উপস্থিত হৈছে। কেডাৰসকলক নাগালেণ্ডৰ মন জিলাৰ মাজেৰে মুক্তভাৱে আহিবলৈ দিয়া হয় আৰু তেওঁলোকক এতিয়া নামনি অসমৰ এটা সেনা নিৱাসত ৰখা হৈছে।

চাওৰাইগৱৰা গোটটো হ’ল নতুন দিল্লীৰ সৈতে শান্তি আলোচনাত থকা এন ডি এফ বিৰ তৃতীয়টো গোট।

ইয়াৰ পূৰ্বে, ২০০৫ চনত এন ডি এফ বিৰ প্ৰগ্ৰেছিভ গোটটোৱে নতুন দিল্লীৰ সৈতে শান্তিচুক্তিত স্বাক্ষৰ কৰিছিল।

এন ডি এফ বিৰ প্ৰগ্ৰেছিভ গোটৰ ৩০০-তকৈও অধিক সদস্য এতিয়া ওদালগুৰি, বাক্সা, আৰু কোকৰাঝাৰত থকা চৰকাৰ অনুমোদিত তিনিটা ডেজিগনেটেড কেম্পত আছে।

এন ডি এফ বিৰ প্ৰতিষ্ঠাপক ৰঞ্জন দৈমাৰীক ২০১০ চনত বাংলাদেশত গ্ৰেপ্তাৰ কৰা হৈছিল আৰু পিছত গুৱাহাটীৰ কেন্দ্ৰীয় কাৰাগাৰলৈ প্ৰেৰণ কৰা হৈছিল।

২০১৩ চনত কাৰাগাৰৰ পৰা মুক্ত হোৱা দৈমাৰীক আদালতে ৰাজহুৱা সভাত ভাগ লোৱা আৰু সংবাদ মাধ্যমৰ আগত মন্তব্য কৰাত বাধা দি চৰ্তাৱলী আৰোপ কৰিছিল।

এন ডি এফ বি প্ৰগ্ৰেছিভৰ পিছত সংগঠনটোৰ ৰঞ্জন দৈমাৰী গোটটোৱেও নতুন দিল্লীৰ সৈতে শান্তি প্ৰক্ৰিয়াত যোগদান কৰে।

১৫ বছৰীয়া শান্তি আলোচনাৰ পিছত এন ডি এফ বি কেডাৰসকলেস এতিয়া নতুন দিল্লীৰ সৈতে এটা সামগ্ৰিক শান্তিচুক্তিৰ ৰেঙনি দেখা পাইছে।

কিন্তু সাধাৰণ বড়ো ৰাইজক এতিয়া এটা ডাঙৰ প্ৰশ্নই খুন্দিয়াবলৈ আৰম্ভ কৰিছে- এন ডি এফ বি (এছ)ৰ মুখ্য সেনাধ্যক্ষ জি বিদাই ওৰফে বিষ্ণু গয়াৰীক প্ৰক্ৰিয়াটোৰ পৰা আঁতৰাই ৰাখিলে শান্তি আলোচনা কামত আহিব নে?

মুখ্য সেনাধ্যক্ষ হোৱাৰ উপৰি বিদাই এন ডি এফ বি (এছ)ৰ উপাধ্যক্ষও।

চোৰাংচোৱাৰ এটা সূত্ৰই কৈছে যে দুৰ্ধৰ্ষ নেতাজনে নতুন দিল্লীৰ সৈতে শান্তি প্ৰক্ৰিয়াত যোগ দিয়াৰ কোনো লক্ষণ দেখুওৱা নাই।

২০১৪ চনৰ ডিচেম্বৰত অসমৰ শোণিতপুৰ জিলাত ৮০জন আদিবাসীক হত্যা কৰা ঘটনাত বিদাইৰ নেতৃত্বাধীন এন ডি এফ বি (এছ) জড়িত আছিল।

সূত্ৰমতে, বিদায়ে প্ৰায় ৫০জন সশস্ত্ৰ কেডাৰক লগত লৈ মানস ৰাষ্ট্ৰীয় উদ্যানৰ সমীপত ভূটানত আত্মগোপন কৰি আছে।

সংগঠনটোৰ এই সশস্ত্ৰ গোটটোৱে ভূটান সীমান্তত থকা উত্তৰ বংগৰ ৰঙামাটি আৰু মহাকাল অঞ্চলতো গোপন ঘাটি পাতি থকা বুলি জানিব পৰা গৈছে।

১৯৯০-ৰ দশকত, এন ডি এফ বিয়ে ভূটান সীমান্তত ১২টা শিবিৰ স্থাপন কৰিছিল। ২০০৩ চনৰ ৰয়েল ভূটান আৰ্মিয়ে চলোৱা অল ক্লিয়েৰ অভিযানত এইবোৰ ধ্বংস কৰা হয়।

বিদ্ৰোহী গোটটো দক্ষিণ ভূটানত থকা তেনেকুৱা দুটা পুৰণি শিবিৰ পুনৰুদ্ধাৰ কৰিবলৈ সক্ষম হোৱা বুলি জানিব পৰা গৈছে।

বিদাই আৰু তেওঁৰ কেডাৰসকলে মাজে মাজে চিৰাং জিলাৰ বেংতল আৰু বাক্সা জিলাৰ বাগানপাৰা আৰু জলাহ অঞ্চলত কূটাঘাতমূলক কাম কৰি আহিছে।

সাধাৰণ বড়ো ৰাইজে বিশ্বাস কৰিবলৈ আৰম্ভ কৰিছে যে এন ডি এফ বিৰ বিদাই গোটটোৱে ভূটান সীমান্তৰ পৰা আহি আক্ৰমণ সংঘটিত কৰি থাকিব আৰু বড়োলেণ্ডত শান্তি বিঘ্নিত কৰা অব্যাহত ৰাখিব।

“যদি তেওঁ (বিদাই) শান্তি প্ৰ্ক্ৰিয়াটোত যোগদান নকৰে, তেওঁ আলফাৰ সেনাধ্যক্ষ পৰেশ বৰুৱাৰ দৰৈ হৈ ৰ’ব”, ছেৰফাংগুৰিৰ এজন বড়ো শিক্ষকে কয়।

পৰেশ বৰুৱাই সভাপতি অৰবিন্দ ৰাজখোৱা আৰু সাধাৰণ সম্পাদক অনুপ চেতিয়াৰ নেতৃত্বত চলি থকা আলফাৰ শান্তি প্ৰক্ৰিয়াটোত অংশ গ্ৰহণ কৰা নাছিল আৰু এটা পৃথক গোট আলফা (স্বাধীন) গঠন কৰে।

বড়োসকলৰ বাবে এখন স্বাধীন দেশ গঠনৰ স্বপ্নেৰে ১৯৮৬ চনত ৰঞ্জন দৈমাৰীৰ দ্বাৰা এন ডি এফ বি গঠন কৰা হৈছিল।

প্ৰথম অৱস্থাত সংগঠনটোৰ নাম আছিল বড়ো ছিকিউৰিটি ফ’ৰ্চ (BdSF)। ১৯৯৪ চনত নামটো সলাই এন ডি এফ বি কৰা হয়।