নাগৰিকত্ব বিধেয়কৰ প্ৰসংগ আলাপ আলোচনাৰ মাধ্যমেৰে সমাধান কৰা হ’ব : নৰেন্দ্ৰ মোডী

অসমত দ্বিতীয় পৰ্য্যায়ৰ নিৰ্বাচনৰ প্ৰচাৰৰ বাবে উপস্থিত হোৱা প্ৰধান মন্ত্ৰী নৰেন্দ্ৰ মোডীয়ে মঙলদৈৰ পাছত শিলচৰত অনুষ্ঠিত হোৱা বিশাল জনসভাত অংশগ্ৰহণ কৰি নাগৰিকত্ব সংশোধনী বিধেয়কৰ প্ৰসংগ উত্থাপন কৰে।

দেশ বিভাজনৰ পাছত মন্দিৰলৈ মানুহ যোৱাৰ দৰে চুবুৰীয়া দেশৰ পৰা নিৰ্যাতনৰ বলি হোৱা মানুহ পবিত্ৰ ভাৰত ভূমিলৈ অহা বুলি মোডীয়ে উল্লেখ কৰি সেই সকলক ভাৰতত নাগৰিকত্ব সংশোধনী বিধেয়কৰ জৰিয়তে সংস্থাপন দিব পৰা যাব বুলি মন্তব্য কৰে।

আনহাতে, ভাৰতীয় জনতা পাৰ্টিৰ চৰকাৰে জনসাধাৰণৰ লগত আলাপ আলোচনাৰ মাধ্যমেৰেহে নাগৰিকত্ব সংশোধনী বিধেয়কৰ প্ৰসংগত আগবাঢ়িব বুলি জনসাধাৰণক আশ্বাস দিয়ে মোডীয়ে।

মোডীয়ে ভাষণত দিল্লীত শক্তিশালী চৰকাৰ গঠন কৰাৰ বাবে বিজেপিৰ প্ৰাৰ্থীক ভোট দান কৰাৰ বাবে আহ্বান জনাই। শিলচৰ আৰু কৰিমগঞ্জ সমষ্টিৰ প্ৰাৰ্থী ডা০ ৰাজদীপ ৰয় আকু কৃপানাথ মাল্লাৰ হৈ নিৰ্বাচনী প্ৰচাৰ চলাই প্ৰধান মন্ত্ৰীগৰাকীয়ে।

তদুপৰি, মোডীয়ে কংগ্ৰেছৰ নেতাসকলে ভোট বিচাৰি গ’লে তেওঁলোকৰ ৰাষ্ট্ৰীয় নেতা আৰু তেওঁৰ মাতৃয়ে কিয় জামিনত থাকিবলাগীয়া হৈছে বুলি প্ৰশ্ন কৰিবলৈ কয়।

শিলচৰৰ জনসভাত প্ৰধান মন্ত্ৰীৰ লগত উপস্থিত থাকে মুখ্য মন্ত্ৰী সৰ্বানন্দ সোণোৱাল। সমষ্টি দুটাত দ্বিতীয় পৰ্য্যায়ত অৰ্থাৎ ১৮ এপ্ৰিলত ভোটগ্ৰহণ অনুষ্ঠিত হ’ব।