বেৰিকেড ভাঙি দিল্লীত প্ৰৱেশ কৃষকৰ, প্ৰতিবাদকাৰীৰ ওপৰত আৰক্ষীৰ কন্দুৱা গেছ, লাঠীচালনা

কেন্দ্ৰীয় চৰকাৰৰ কৃষি আইন তিনিখনৰ বিৰুদ্ধে কৃষকসকলে সাব্যস্ত কৰি থকা প্ৰতিবাদে আজি চৰম সীমা অতিক্ৰম কৰিছে।

দিল্লী আৰক্ষীৰ পৰা অনুমতি পোৱাৰ পিছত আজি গণৰাজ্য দিৱসৰ দিনা কৃষি আইনৰ বিৰুদ্ধে দিল্লীত কৃষকসকলে ট্ৰেক্টৰ ৰেলী উলিয়াইছে।

দেশবাসীয়ে গণৰাজ্য দিৱস উদযাপন কৰি থকা সময়তে প্ৰতিবাদকাৰী কৃষকসকলে দিল্লীৰ কেইবাটাও সীমান্তত আৰক্ষীৰ বেৰিকেড ভাঙি দিল্লীত প্ৰৱেশ কৰা পৰিলক্ষিত হৈছে।

এই ধৰণৰ কাৰ্যকলাপ ৰোধ কৰিবলৈ আৰক্ষীয়ে কৃষকসকলৰ ওপৰত নিৰ্বিচাৰভাৱে লাঠীচালনা আৰু কন্দুৱা গেছ প্ৰয়োগ কৰে।

উল্লেখ্য যে সিংঘু, টিকৰী আৰু গাজীপুৰ সীমান্তত হাজাৰ হাজাৰ প্ৰতিবাদকাৰী কৃষকে আৰক্ষীৰ বেৰিকেড ভাঙি দিল্লীত প্ৰৱেশ কৰা বুলি জানিব পৰা গৈছে।

শান্তিপূৰ্ণভাৱে ট্ৰেক্টৰ ৰেলী উলিওৱাৰ প্ৰতিশ্ৰুতি দিয়া প্ৰতিবাদ উগ্ৰ হ’বলৈ ধৰাত সঞ্জয় গান্ধী ট্ৰান্সপ’ৰ্ট নগৰত কৃষকসকলৰ ওপৰত কন্দুৱা গেছ আৰু গাজীপুৰত লাঠীচালনা কৰিবলৈ বাধ্য হয় আৰক্ষী।

কৃষকসকলে নিৰ্ধাৰিত সময়তৰ আগতে এই ৰেলীটো উলিওৱাৰ বাবেই বিভিন্ন ঠাইত আৰক্ষী আৰু প্ৰতিবাদকাৰী কৃষকৰ মাজত সংঘাতৰ সৃষ্টি হৈছে বুলি ধাৰণা কৰা হৈছে।

বৰ্তমান প্ৰতিবাদকাৰী কৃষকসকলে হাজাৰ-হাজাৰ ট্ৰেক্টৰ লৈ সংসদ ভৱন আৰু লালকিল্লালৈ আগবাঢ়িছে।