‘ব্ৰেণ্ড এম্বেচাদৰ’ৰ নামত কোটি টকা ব্যয় কৰা চৰকাৰৰ চকুত পৰিবনে গুপ্তকাশী বিশ্বনাথ ঘাট?
যি সময়ত অসম চৰকাৰে পৰ্যটনক্ষেত্ৰৰ প্ৰচাৰৰ নামত কোটি টকা ব্যয় কৰি বলিউডৰ মোহময়ী অভিনেত্ৰী প্ৰিয়ংকা চোপ্ৰাক ব্ৰেণ্ড এম্বেচাদৰ হিচাপে নিয়োগ কৰিছে ইয়াৰ বিপৰীতে পৰ্যটনখণ্ডৰ উন্নয়নৰ বাবে আন্তঃগাঁঠনি নিৰ্মাণকে ধৰি ঐতিহাসিক স্থানসমূহৰ সংৰক্ষণৰ ক্ষেত্ৰত গ্ৰহণ কৰা ব্যৱস্থা অতি পুতৌজনক।
পৰ্যটন নগৰী হিচাপে জনাজাত গুপ্তকাশী বিশ্বনাথ ঘাটলৈ মন কৰিলেই চৰকাৰৰ এই উদাসীনতা ওলাই পৰে। উল্লেখযোগ্য যে প্ৰাকৃতিক সৌন্দৰ্য্যৰে পৰিপূৰ্ণ তথা দ্বিতীয় কাশী হিচাপে খ্যাত গুপ্তকাশী বিশ্বনাথ ঘাটক আগশাৰীৰ পৰ্যটনস্থল হিচাপে গঢ় দিয়াৰ প্ৰচুৰ সম্ভাৱনা আছে যদিও চৰকাৰৰ গাফিলতিৰ বাবে এতিয়া ই ধ্বংসৰ দিশে গতি কৰিছে।
বিশ্বনাথ ঘাটত আহোম যুগৰ পৌৰাণিক সম্পদসমূহ সংৰক্ষণ কৰাৰ বাবে উপযুক্ত ব্যৱস্থা গ্ৰহণ কৰি কেনেধৰণে পৰ্যটকৰ আকৰ্ষণৰ কেন্দ্ৰবিন্দু কৰি তুলিব পাৰি সেই সম্পৰ্কে ৰাজ্য চৰকাৰৰ হস্তক্ষেপ বিচাৰি স্থানীয় ৰাইজে বহুবাৰ সংবাদ মাধ্যমৰ জৰিয়তে অনুৰোধ জনাইছে যদিও চৰকাৰ তথা পৰ্যটন বিভাগ ঘোৰ নিদ্ৰাৰত।