সংসদীয় স্থায়ী কমিটিৰ বৈঠকত এন আৰ এলৰ ব্যক্তিগতকৰণৰ বিৰোধিতা সাংসদ প্ৰদ্যুত বৰদলৈৰ

সংসদীয় স্থায়ী সমিতিৰ বৈঠকত শুকুৰবাৰে কংগ্ৰেছৰ লোকসভাৰ সাংসদ প্ৰদ্যুত বৰদলৈয়ে নুমলীগড় শোধনাগাৰ লিমিটেড (এন আৰ এল)ক ব্যক্তিগতকৰণৰ ক্ষেত্ৰত কেন্দ্ৰৰ সিদ্ধান্তৰ বিৰোধিতা কৰে।

ৰমেশ বিধুৰীয়ে অধ্যক্ষতা কৰা সংসদীয় সমিতিৰ বৈঠকত সাংসদ বৰদলৈয়ে বিষয়টো উত্থাপন কৰি এন আৰ এলৰ ব্যক্তিগতকৰণ অসমৰ জনসাধাৰণৰ পক্ষে গ্ৰহণযোগ্য নহয় বুলি কয়।

কেন্দ্ৰৰ এন আৰ এলক ব্যক্তিগতকৰণৰ সিদ্ধান্তই অসমত তীব্ৰ উত্তেজনাৰ সৃষ্টি কৰিব বুলিও বৰদলৈয়ে মন্তব্য কৰে।

বৈঠকত প্ৰদ্যুত বৰদলৈয়ে ঐতিহাসিক অসম চুক্তি অনুসৰি এন আৰ এল স্থাপন কৰা হৈছিল বুলিও উল্লেখ কৰে।

ভাৰত পেট্ৰ’লিয়াম কৰপোৰেশ্যন লিমিটেড (বিপিচিএল), অইল ইণ্ডিয়া লিমিটেড আৰু অসম চৰকাৰৰ অংশীদ্বাৰিত্বৰে তেল শোধনাগাৰটো কেন্দ্ৰীয় ৰাজহুৱা খণ্ডৰ প্ৰতিষ্ঠান হিচাপে স্থাপন কৰা হৈছিল। য’ত বিপিচিএলৰ ৬১.৬৫ শতাংশ, অইল ইণ্ডিয়াৰ ২৬ শতাংশ আৰু অসম চৰকাৰৰ ১২.৩৫ শতাংশ অংশীদ্বাৰিত্ব আছে,’’ বৰদলৈয়ে কয়।

আনহাতে, কেন্দ্ৰই অলপতে বিপিচিএলত নিয়োগ কৰা বন্ধ কৰি ইয়াৰ ব্যক্তিগতকৰণৰ বাবে আগবাঢ়িছে বুলি উল্লেখ কৰি প্ৰদ্যুত বৰদলৈয়ে বিপিচিএলৰ ব্যক্তিগতকৰণে এন আৰ এলকো ব্যক্তিগতকৰণলৈ লৈ যাব বুলি কয়।