কোভিড ৰোগীৰ চিকিৎসাত ছালৰ ৰোগত ব্যৱহৃত দৰৱ প্ৰয়োগৰ অনুমতি ঔষধ নিয়ন্ত্ৰকৰ

প্ৰতিকাৰহীন ৰোগ কোভিড-১৯। কোভিড সৃষ্টিকাৰী ক’ৰ’ণা ভাইৰাছ প্ৰতিৰোধ কৰিবলৈ বিশ্বৰ বিজ্ঞানী মহলে নিৰন্তৰ চেষ্টা অব্যাহত ৰাখিছে।

কোভিডৰ দৰৱ প্ৰস্তুত কৰাৰ বাবেও বিজ্ঞানী সকলে দিনে-নিশাই শ্ৰম কৰিছে।

সঠিক দৰৱ অথবা ভেকচিন সাজু নোহোৱা পৰ্যন্ত কোভিডত আক্ৰান্ত ৰোগীৰ চিকিৎসাৰ বাবে বিশ্বৰ বিভিন্ন দেশত বিভিন্ন ধৰণৰ দৰৱ প্ৰয়োগ কৰি থকা হৈছে।

ভাৰততো কোভিড আক্ৰান্ত ৰোগীক কেতবোৰ বিশেষ দৰৱ প্ৰদান কৰা হৈছে। শেহতীয়াকৈ ভাৰতৰ কেন্দ্ৰীয় ঔষধ নিয়ন্ত্ৰকে কোভিড আক্ৰান্ত ৰোগীৰ ক্ষেত্ৰত ছালৰ ৰোগত ব্যৱহাৰ কৰা দৰৱ আইট’লিজুমেব ব্যৱহাৰত অনুমোদন জনাইছে।

ভাৰতৰ কেন্দ্ৰীয় ঔষধ নিয়ন্ত্ৰক ভি জি ছোমানীয়ে এই প্ৰসংগত কয় যে মন’ক্লল এন্টিবডি ইঞ্জেকছনে কোভিডত আক্ৰান্ত ৰোগীৰ ছালত দেখা দিয়া বিভিন্ন সমস্যা দূৰ কৰাৰ লগতে ৰোগীৰ শ্বাস-প্ৰশ্বাস জনিত উপসৰ্গ বোৰো দূৰ কৰাত সহায় কৰিব পাৰে।

কোভিড আক্ৰান্ত বিভিন্ন ৰোগীৰ দেহত এই ইঞ্জেকছন প্ৰয়োগ কৰি সুফল লাভ কৰিব পৰা গৈছে বুলি তেওঁ মন্তব্য কৰে।

তেওঁ লগতে কয় যে এই দৰৱ বিধ সীমিত মাত্ৰাত ৰোগীৰ দেহত প্ৰয়োগ কৰাত কোনো বাধা নাই।

ভাৰতে কোভিড ৰোগীৰ ক্ষেত্ৰত হাইড্ৰক্সি ক্ল’ৰ’কুইন দৰৱ প্ৰয়োগ কৰিছিল যদিও বিশ্ব স্বাস্থ্য সংস্থাই এই দৰৱৰ ব্যৱহাৰত নিষেধাজ্ঞা আৰোপ কৰাত কোভিড ৰোগীৰ ক্ষেত্ৰত এই দৰৱৰ প্ৰয়োগ বন্ধ কৰা হৈছে।