ভাৰত-আমেৰিকাৰ প্ৰস্তাৱিত বাণিজ্য চুক্তিৰ বিৰোধিতা কৃষকসকলৰ; আজি দিল্লীত ৫৫০টা সংগঠনৰ মহাপঞ্চায়ত

ভাৰত-আমেৰিকাৰ প্ৰস্তাৱিত দ্বিপাক্ষিক চুক্তিৰ প্ৰতিবাদত দেশ বাচাও মৰ্চাই মহাপঞ্চায়তৰ আহ্বান জনাইছে। মঙলবাৰে দিল্লীৰ কিষাণ ঘাটত অনুষ্ঠিত হ’ব মহাপঞ্চায়ত। ইয়াত যোগদান কৰিবলৈ ইতিমধ্যে পঞ্জাৱৰ পৰা হাজাৰ হাজাৰ কৃষক ৰাওনা হৈছে। এই কাৰ্যসূচীত সমগ্ৰ দেশৰ পৰা প্ৰায় ৫৫০ টা কৃষক আৰু বিভিন্ন সামাজিক সংগঠনে অংশগ্ৰহণ কৰিব বুলি আয়োজকসকলে দাবী কৰিছে।

দিল্লীলৈ যোৱাৰ পূৰ্বে পঞ্জাৱ কিষাণ মজদুৰ সংঘৰ্ষ সমিতিৰ নেতা জাৰ্মানজিৎ সিং বান্দালাই বিয়াছত সাংবাদিকক সম্বোধন কৰি কয় যে যদিহে এই প্ৰস্তাৱিত বাণিজ্যিক চুক্তি কাৰ্যকৰী হয় তেন্তে দেশৰ কৃষক, শ্ৰমিক, ক্ষুদ্ৰ ব্যৱসায়ী আৰু সাধাৰণ জনতাই আটাইতকৈ বেছি ক্ষতিগ্ৰস্ত হ’ব।

তেওঁ অভিযোগ কৰে যে, “আমেৰিকাৰ কৃষক আৰু বৃহৎ কোম্পানীসমূহৰ স্বাৰ্থ ৰক্ষাৰ বাবে এই চুক্তি কৰা হৈছে। ভাৰতৰ ক্ষুদ্ৰ আৰু প্ৰান্তীয় কৃষকসকলৰ কথা ইয়াত ভবা হোৱা নাই।”

বান্দালাই দাবী কৰে যে আমেৰিকাত হাজাৰ হাজাৰ একৰ মাটিত খেতি কৰা হয়। কৃষকসকলে লাভ কৰে বৃহৎ চৰকাৰী ৰাজসাহায্য। কিন্তু ভাৰতৰ অধিকাংশ কৃষকৰ মাটিকালি মাত্ৰ দুইৰ পৰা আঢ়ৈ একৰ। ইয়াৰ তুলনাত চৰকাৰী সাহায্যও বহু কম। তেওঁৰ আশংকা, ‘এই চুক্তিৰ ফলস্বৰূপে আমেৰিকাৰ পৰা কৃষিজাত সামগ্ৰী কম মূল্যত ভাৰতত প্ৰৱেশ কৰিব। ফলত ভাৰতীয় কৃষকৰ বাবে প্ৰতিযোগিতাত জীয়াই থকাটো কঠিন হৈ পৰিব।’

বান্দালাই কৃষি খণ্ডক বিদেশী প্ৰতিযোগিতাৰ পৰা ৰক্ষা কৰিবলৈ আহ্বান জনাইছে। তেওঁৰ অভিযোগ, ‘আমেৰিকাৰ হেঁচাত কেন্দ্ৰীয় চৰকাৰক এই চুক্তি কৰিবলৈ বাধ্য কৰা হৈছে।’ তেওঁৰ মতে, ‘ইয়াৰ প্ৰভাৱ কেৱল কৃষি খণ্ডতে সীমাবদ্ধ নাথাকিব, ইয়াৰ নেতিবাচক প্ৰভাৱ ক্ষুদ্ৰ ব্যৱসায় আৰু কৰ্মসংস্থাপনৰ ওপৰতো পৰিব।’ তেওঁ কয় যে কেৱল পঞ্জাৱৰ পৰাই নহয় দেশৰ বিভিন্ন প্ৰান্তৰ পৰাও কৃষকসকলে এই মহাপঞ্চায়তত যোগদান কৰিব।

অৱশ্যে কৃষকৰ এই আন্দোলন বন্ধ কৰিবলৈ দিল্লী আৰক্ষীও সাজু হৈছে। ইতিমধ্যে ৰাজধানীৰ বিভিন্ন অঞ্চলত বেৰিকেড লগোৱা হৈছে। বান্দালাই কয় যে প্ৰশাসনে যদি তেওঁলোকক দিল্লীত প্ৰৱেশ কৰাত বাধা দিয়ে, তেন্তে কৃষকসকলে য’তেই বাধা দিয়া হ’ব তাতেই শান্তিপূৰ্ণভাৱে প্ৰতিবাদ কৰিব। ভাৰত-আমেৰিকাৰ প্ৰস্তাৱিত বাণিজ্যিক চুক্তি বাতিল নকৰিলে বৃহৎ আন্দোলনৰ কথাও তেওঁ সকীয়াই দিয়ে। আমাৰ দাবী পূৰণ নোহোৱালৈকে যুঁজখন অব্যাহত থাকিব বুলিও কয় বান্দালাই।