শিৱসাগৰত স্বাব সংগ্ৰহ, ৰেপিড এণ্টিজেন টেষ্ট কেন্দ্ৰ মুকলি

শিৱসাগৰ জিলাৰ উপায়ুক্ত লক্ষীনন্দন গগৈয়ে মঙলবাৰে ১নং টাউন প্ৰাথমিক বিদ্যালয় প্ৰাংগণত এটি ক’ভিড-১৯ৰ স্বাব সংগ্ৰহ আৰু ৰেপিড এন্টিজেন টেষ্ট কেন্দ্ৰৰ শুভ উদ্বোধন কৰে।

উদ্বোধনী অনুষ্ঠানৰ লগত সংগতি ৰাখি আয়োজন কৰা সভাত উপায়ুক্তগৰাকীয়ে নিজ বক্তব্যত কয় যে জিলা প্ৰশাসনে ক’ভিড-১৯ -ৰ গণসংক্ৰমণ প্ৰতিৰোধৰ বাবে গ্ৰহণ কৰা ব্যৱস্থা সমূহৰ এক অংশৰূপে এই স্বাৱ সংগ্ৰহ আৰু ৰেপিড এন্টিজেন টেষ্ট কেন্দ্ৰটি মুকলি কৰা হৈছে।

স্বাস্থ্য মন্ত্ৰী হিমন্ত বিশ্ব শৰ্মাই যোৱা ১৯ জুলাইত জিলাখনত অনুষ্ঠিত এক পৰ্য্যালোচনা সভাত অংশগ্ৰহণ কৰি প্ৰদান কৰা এক নিৰ্দেশ মৰ্মে এই কেন্দ্রটি স্থাপন কৰা হৈছে বুলিও তেওঁ সদৰী কৰে।

জিলাখনৰ ৰাইজৰ সুবিধাৰ্থে আৰু তিনিটা স্বাব সংগ্ৰহ কেন্দ্ৰ কাইলৈৰ পৰা মুকলি কৰাৰ ব্যৱস্থা গ্ৰহণ কৰা হৈছে বুলি উপায়ুক্তগৰাকীয়ে উল্লেখ কৰে।

এই কেন্দ্ৰকেইটা হ’ল ক্ৰমে শিৱসাগৰ পলিটেকনিক উচ্চতৰ মাধ্যমিক বিদ্যালয়, ৫০২নং জেঙণিকটিয়া বালিকা প্ৰাথমিক বিদ্যালয় আৰু শিৱসাগৰ ছোৱালী মহাবিদ্যালয়।

ক’ভিড-১৯ৰ গণসংক্ৰমণ ৰোধৰ বাবে ৰাইজে সচেতন হৈ স্বেচ্ছাই স্বাব পৰীক্ষা কৰিবলৈ আগবাঢ়ি অহা উচিত বুলি উল্লেখ কৰে।

ইয়াৰ দ্বাৰা নিজৰ লগতে আনৰো সুৰক্ষা নিশ্চিত হ’ব বুলিও তেওঁ মন্তব্য কৰে।

উপায়ুক্তগৰাকীয়ে লগতে উল্লেখ কৰে যে, ক’ভিড-১৯ ৰোগীৰ সংখ্যা বৃদ্ধি পোৱাৰ সম্ভাৱনাৰ প্ৰতি লক্ষ্য ৰাখি স্থানীয় আৰ্বান মডেল হস্পিটেল খনক ক’ভিড কেয়াৰ চেণ্টাৰ হিচাপে অতি শীঘ্ৰে প্ৰতিষ্ঠা কৰা হ’ব।

এই সন্দৰ্ভত যাৱতীয় প্ৰস্তুতি ইতিমধ্যে ৯০শতাংশ সম্পূৰ্ণ হৈছে বুলি তেওঁ জনায়।

পৰৱৰ্তী পৰ্যায়ত কোৱাৰেণ্টাইন চেণ্টাৰ হিচাপে কাম কৰি থকা ডিমৌ পলিটেকনিক প্ৰতিষ্ঠানকো ক’ভিড কেয়াৰ চেণ্টাৰ হিচাপে গঢ়ি তোলা হ’ব বুলিও তেওঁ উল্লেখ কৰে।

জিলা প্ৰশাসনে ক’ভিড ৰোগীৰ বাবে জিলাখনত আৰু ২৫০খন বিচনাৰ ব্যৱস্থা কৰিব বুলিও উপায়ুক্তগৰাকীয়ে জনায়।

তেওঁ জিলাখনৰ সংবাদসেৱী সকলক জনসাধাৰণৰ মাজত ক’ভিড-১৯ ৰোগৰ বিষয়ে সচেতনতা বৃদ্ধিৰ ক্ষেত্ৰত আগভাগ ল’বলৈও আহ্বান জনায়।

আজিৰ সভাখনত সভাপতিত্ব কৰে জিলা স্বাস্থ্য বিভাগৰ যুটীয়া সঞ্চালক ডাঃ শ্যমন্ত মাধৱ শৰ্মাই।

জিলা যক্ষ্মাৰোগ বিষয়া ডাঃ উদায়াদিত্য ৰাজকোঁৱৰে সভাত ৰেপিড এন্টিজেন টেষ্ট সম্পৰ্কে এক চমু আভাস দিয়ে।

আজিৰ উদ্বোধনী অনুষ্ঠানত উপস্থিত থাকে অতিৰিক্ত উপায়ুক্ত বিদিত দাস, স্বাস্থ্য বিভাগৰ অতিৰিক্ত যুটীয়া সঞ্চালক ডাঃ মুকুল চন্দ্ৰ দাস, জিলা কুষ্ঠৰোগ বিষয়া দিজেন কোচৰ লগতে ভালে সংখ্যক স্বাস্থ্যকৰ্মী আৰু স্থানীয় ৰাইজ।