চামগুৰিত কংগ্ৰেছ দলৰ প্ৰাৰ্থী ৰকিবুল হুছেইনৰ ভোটাধিকাৰ সাৱ্যস্ত

প্ৰথম পৰ্যায়ৰ ভোট গ্ৰহণৰ সময়ত নগাঁও জিলাৰ চামগুৰি বিধান সভা সমষ্টিত পুৱাৰ পৰাই কেন্দ্ৰসমূহত ভোটাৰ ৰাইজৰ ভিৰ হোৱা পৰিলক্ষিত হয় ৷

বিগত ২০ বছৰে চামগুৰি সমষ্টিৰ পৰা প্ৰতিনিধিত্ব কৰা প্ৰাক্তন মন্ত্ৰী ৰকিবুল হুছেইনে আজি পুৱা আমনি বস্তি এল পি স্কুলৰ ২৪ নং ভোট গ্ৰহণ কেন্দ্ৰত পত্নী নাজনিন হুছেইন আৰু পুত্ৰ টানজিল হুছেইনক লগত লৈ ভোটাধিকাৰ সাব্যস্ত কৰা পৰিলক্ষিত হৈছে ৷

প্ৰাক্তন মন্ত্ৰী ৰকিবুল হুছেইনে ভোটাধিকাৰ সাব্যস্ত কৰি সংবাদ মাধ্যমৰ আগত কয় যে এইবাৰো মোক চামগুৰি সমষ্টিবাসী ৰাইজে বিপুল ভোটত জয় কৰাব কাৰণ চামগুৰি বাসী ৰাইজৰ লগত মোৰ এক আত্মিক সম্পৰ্ক আছে।

এইবাৰ কংগ্ৰেছ মহাজোঁটৰ চৰকাৰ হ’ব বুলি সংবাদ মাধ্যমৰ আগত ৰকিবুল হুছেইনে দাবী কৰে ৷আনহাতে
চামগুৰি সমষ্টিৰ বিজেপিৰ মিত্ৰজোঁটৰ প্ৰাৰ্থী অনিল শইকীয়াই পুৱাই কঢ়ালিগাওঁ গধৰীয়া প্ৰাইমেৰী স্কুলৰ ভোট কেন্দ্ৰত উপস্থিত হৈ নিজৰ ভোটাধিকাৰ সাব্যস্ত কৰাৰ লগতে এইবাৰ পুনৰ মিত্ৰজোঁটৰ চৰকাৰ হ’ব বুলি দাবী কৰে ৷

চামগুৰিৰ ৰাইজে এইবাৰ ৰকিবুল হুছেইনক বিপুল ভোটত পৰাস্ত কৰি চামগুৰি সমষ্টিত এক নতুন দিগন্ত সুচনা কৰিব বুলি অনিল শইকীয়াই সংবাদ মাধ্যমৰ আগত মন্তব্য কৰে ।