উত্তৰ পূব সীমান্ত ৰে’লৱেৰ ৰে’লৱে সুৰক্ষা বাহিনীৰ দ্বাৰা ২২৫ জন অবৈধ প্ৰব্ৰজনকাৰীক কৰায়ত্ত
অবৈধ প্ৰব্ৰজনকাৰী (বাংলাদেশী আৰু ৰহিংগীয়া) চিনাক্ত কৰাৰ যুঁজ অব্যাহত ৰাখি উত্তৰ-পূব সীমান্ত ৰে’লৱেৰ ৰে’লৱে সুৰক্ষা বাহিনীয়ে (আৰপিএফ) ২০২৪ বৰ্ষৰ ০১ জানুৱাৰীৰ পৰা ১৫ আগষ্ট পৰ্যন্ত উত্তৰ পূব সীমান্ত ৰে’লৱেৰ বিভিন্ন ষ্টেচনত তালাচী চলাই ২২৫ জন অবৈধ প্ৰব্ৰজনকাৰী আৰু ১৬ জন ভাৰতীয় এজেণ্টক আটক কৰে।
চলিত মাহৰ ১৫ আগষ্ট পৰ্যন্ত উত্তৰ পূব সীমান্ত ৰে’লৱেৰ ৰে’লৱে সুৰক্ষা বাহিনীয়ে ২২ জন অবৈধ প্ৰব্ৰজনকাৰীক কৰায়ত্ত কৰিবলৈ সক্ষম হৈছে। উত্তৰ পূব সীমান্ত ৰে’লৱেৰ এক প্ৰেছ বিজ্ঞপ্তিত এই কথা সদৰী কৰা হৈছে।
২০২৪ বৰ্ষৰ ০১আগষ্টত সংঘটিত এক ঘটনাত, আগৰতলাৰ ৰে’লৱে সুৰক্ষা বাহিনীৰ দলে জিআৰপি/আগৰতলাৰ সৈতে যুটীয়াভাৱে আগৰতলা ৰে’ল ষ্টেচনত নিয়মীয়া অনুসন্ধান চলায়। অনুসন্ধানৰ সময়ত তেওঁলোকে ষ্টেচন চৌহদত ১০জন সন্দেহজনক ব্যক্তি চিনাক্ত কৰে (০৩গৰাকী মহিলা আৰু ০৭জন পুৰুষ)।
লগতে পঢ়কঃ ৰাসায়নিক কাৰখানাত ভয়াবহ বিস্ফোৰণ; ১৭ জনৰ মৃত্যু, আহত কমেও ৪০ জন
সোধা-পোছাৰ পিছত, তেওঁলোকে তেওঁলোকৰ ভ্ৰমণৰ কোনো সঠিক তথ্য প্ৰদান দিব নোৱাৰিলে আৰু কোনো বৈধ নথি পত্ৰ দেখুৱাব নোৱাৰিলে। তাৰ পিছত তেওঁলোকে স্বীকাৰ কৰে যে তেওঁলোক বাংলাদেশৰ পৰা অবৈধভাৱে ভাৰতত প্ৰৱেশ কৰিছে আৰু ৰে’লযোগে দিল্লীলৈ যোৱাৰ পৰিকল্পনা কৰিছিল।
পিছত সকলো অবৈধ প্ৰব্ৰজনকাৰীক পৰৱৰ্তী আইনী ব্যৱস্থাগ্ৰহণৰ বাবে আগৰতলাৰ চৰকাৰী ৰে’লৱে আৰক্ষীৰ ভাৰপ্ৰাপ্ত বিষয়াৰ হাতত গতাই দিয়া হয়। ইয়াৰ পূৰ্বে ২০২৪ বৰ্ষৰ ০২ আৰু ২৩ জুলাইত আগৰতলা ষ্টেচনৰ পৰা ক্ৰমে ১১ আৰু ৪ জন অবৈধ প্ৰব্ৰজনকাৰীক কৰায়ত্ত কৰা হয়।
লগতে পঢ়কঃ নাৰী নিৰ্যাতনত অভিযুক্ত দেশৰ ১৫১গৰাকী সাংসদ-বিধায়ক; ১৬গৰাকীৰ বিৰুদ্ধে আছে ধৰ্ষণৰ গোচৰ
ষ্টেচন আৰু ৰে’লত অবৈধ প্ৰব্ৰজনকাৰী, ৰহিংগীয়া আৰু সন্দেহযুক্ত লোকসকলৰ ওপৰত তীক্ষ্ণ দৃষ্টি ৰাখিবলৈ উত্তৰ পূব সীমান্ত ৰে’লৱেৰ ৰে’লৱে সুৰক্ষা বাহিনীয়ে নিয়মীয়াকৈ কেইবাটাও পদক্ষেপ গ্ৰহণ কৰিছে। কৰ্ত্তব্যৰত ৰে’লৱে সুৰক্ষা বাহিনীৰ জোৱানসকলে এনে ধৰণৰ যিকোনো ধৰণৰ সন্দেহজনক গতিবিধি চিনাক্ত কৰিবলৈ বিভিন্ন স্তৰত সতৰ্ক হৈ আছে।