শিশু শিক্ষা সমিতিৰ সদৌ অসম কুইজত নলবাৰীৰ মৃণাল লস্কৰ আৰু প্ৰজ্ঞাদীপ শ্ৰেষ্ঠ

শিশু শিক্ষা সমিতি অসমৰ উদ্যোগত আজি অনুষ্ঠিত সদৌ অসম ভিত্তিক কুইজ প্ৰতিযোগিতাত শংকৰদেৱ বিদ্যা নিকেতন, বৰভাগ, নলবাৰীৰ মৃণাল লস্কৰ আৰু প্ৰজ্ঞাদীপ ভট্টাচাৰ্য্যই প্ৰথম পুৰস্কাৰ লাভ কৰিছে।

গড়কাপ্টানী বিভাগৰ সন্মিলন আৰু প্ৰশিক্ষণ কেন্দ্ৰত অনুষ্ঠিত প্ৰতিযোগিতাখনত দ্বিতীয় স্থান লাভ কৰে শংকৰদেৱ বিদ্যা নিকেতন, বনগাওঁ, মজুলীৰ আশাদ্বীপ শইকীয়া আৰু হিমাদ্ৰী মুদৈয়ে।

শংকৰদেৱ বিদ্যা নিকেতন,  হাতীচোং , নগাৱঁৰ শুভলক্ষ্মী হাজৰিকা আৰু পৰাগ জ্যোতি শইকীয়াই তৃতীয় পুৰস্কাৰ লাভ কৰে।

পণ্ডিত আনন্দৰাম বৰুৱাৰ নামত উৎসৰ্গিত প্ৰতিযোগিতাখন শিশু শিক্ষা সমিতি অসমৰ অধীন বিদ্যালয়বিলাকৰ মাজতে সীমাবদ্ধ আছিল আৰু ঘাইকৈ ওপৰৰ শ্ৰেণীৰ (অষ্টম, নৱম আৰু দশম) ছাত্ৰ-ছাত্ৰীয়ে অংশগ্ৰহণ কৰিছিল। মুঠ যোগদান কৰা দল ২৪টা আছিল।

শিশু শিক্ষা সমিতিৰ সূত্ৰই জানিবলৈ দিয়া মতে, শিশু শিক্ষা সমিতি, অসমে পোনপ্ৰথমবাৰৰ বাবে সদৌ অসম ভিত্তিত এনেদৰে কুইজ প্ৰতিযোগিতা অনুষ্ঠিত কৰে।

শিশু শিক্ষা সমিতি, অসম আৰ এছ এছৰ দ্বাৰা নিয়ন্ত্ৰিত বেচৰকাৰী শিক্ষা খণ্ড বিদ্যা ভাৰতীৰ অধীন।

প্ৰতিযোগিতাখনৰ প্ৰাক মুহূৰ্তত ছাত্ৰ-ছাত্ৰী আৰু শিক্ষকসকলক উদ্দেশ্যি বিদ্যা ভাৰতীৰ ৰাষ্ট্ৰীয় সম্পাদক ব্ৰহ্মাজী ৰাও, শিশু শিক্ষা সমিতি অসমৰ সভাপতি ড০ নিৰ্মল বৰুৱা, এছ বি দেওৰা মহাবিদ্যালয়ৰ উপাধক্ষ্য ড০ নিৰঞ্জন কলিতা আদি বিশিষ্ট ব্যক্তিসকলে ভাষণ প্ৰদান কৰে।

তিনিমহীয়া আলোচনী বিদ্যাভাৰতী সংবাদত ২০ বছৰে সেৱা আগবঢ়োৱা শশীপ্ৰভা দাসকে শিশু শিক্ষা সমিতিৰ তৰফৰ পৰা সম্বৰ্ধনা জনোৱা হয়।

বিদ্যা ভাৰতী উত্তৰ অসমৰ প্ৰান্ত সংগঠনিক সম্পাদক হেমন্ত ধিং মজুমদাৰে কুইজ প্ৰতিযোগিতাখন সন্দৰ্ভত কয় যে ছাত্ৰ-ছাত্ৰীসকলে কিতাপৰ শিক্ষাৰ লগতে যাতে অসমৰ কলা-সংস্কৃতি, ইতিহাস, ভূগোল সম্বন্ধেও জ্ঞাত হয়, তাৰ প্ৰয়াসৰ অংশস্বৰূপেই এই প্ৰতিযোগিতাখন অনুষ্ঠিত কৰা হৈছে।

শিশু শিক্ষা সমিতি, অসমৰ প্ৰান্ত প্ৰচাৰক শৈলেন্দ্ৰ পাণ্ডেই কয়, শিশুসকলে নিজৰ ৰাজ্যখনক তথা দেশখনক যাতে আৰু অধিক ভালদৰে জানিব পাৰে তাৰে এটা প্ৰয়াস এই প্ৰতিযোগিতা।