সোণমক বচাবলৈ আন যুৱতীক হত্যাৰ পৰিকল্পনা; জেৰাত প্ৰেমিক ৰাজৰ চাঞ্চল্যকৰ স্বীকাৰোক্তি   

আৰক্ষীৰ জিম্মাত থকা মেঘালয় হানিমুন হত্যাকাণ্ডৰ অভিযুক্তৰ বক্তব্যৰ পৰাই চাঞ্চল্যকৰ তথ্য ওলাইছে। ইন্দোৰৰ পৰিবহণ ব্যৱসায়ী ৰাজা ৰঘুবংশীৰ হত্যাকাণ্ডৰ অভিযুক্ত সোণম আৰু প্ৰেমিক ৰাজৰ পৰিকল্পনা শুনি চকু কপালত উঠিছে তদন্তকাৰী দলৰ।

আৰক্ষীক বিভ্ৰান্ত কৰিবলৈ মেঘালয়ৰ চোহৰা বা নাংৰিহাট অঞ্চলত পথত খোজকাঢ়ি যোৱা যিকোনো যুৱতীক হত্যা কৰাৰ পৰিকল্পনা কৰিছিল সোণম আৰু তেওঁৰ প্ৰেমিক ৰাজে। আৰক্ষীয়ে দাবী কৰিছে যে মেঘালয় হানিমুন হত্যাকাণ্ডৰ অভিযুক্তক জিম্মাত লোৱাৰ পিছত প্ৰথম ৰাউণ্ডৰ জেৰাত এই তথ্য আহিছে।

পূব খাছী হিলছৰ জিলা আৰক্ষী অধীক্ষক বিবেক ছিয়েমে কয় যে প্ৰথম অৱস্থাত সিদ্ধান্ত লোৱা হৈছিল যে ৰাজাক হত্যা কৰাৰ পিছত অপহৰণকাৰীয়ে সোণমক হত্যা কৰি নদীত পেলাই দিয়াৰ কাহিনী সজাব। কিন্তু সেই কাহিনী কোনে কেনেকৈ বিয়পাই দিব সেইটো সোনমৰ দলটোৱে সিদ্ধান্ত ল’ব পৰা নাছিল।

পিছত তেওঁলোকে সিদ্ধান্ত লয় যে ৰাজাক হত্যা কৰাৰ পিছত খোজ কাঢ়ি যোৱা কোনো এগৰাকী যুৱতীক তেওঁলোকে হত্যা কৰিব। হত্যাৰ উদ্দেশ্য হ’ব এই কথা প্ৰচাৰ কৰা যে অপহৰণকাৰীয়ে ৰাজাৰ লগতে সোণমকো হত্যা কৰিছে।

সোণমহঁতে সিদ্ধান্ত লয় যে হত্যাকাণ্ডৰ পিছত ৰাজাৰ মৃতদেহটো দূৰৈৰ খাৱৈত পেলাই দিয়া হ’ব। ইয়াৰ পিছত তাতেই এগৰাকী অচিনাকি যুৱতীক হত্যা কৰি তাইৰ মৃতদেহ আৰু ভাড়াতীয়া স্কুটিখন পেট্ৰ’লেৰে জ্বলাই দিয়া হ’ব। উদ্দেশ্য আছিল যুৱতীগৰাকীৰ মৃতদেহ যাতে আৰক্ষীয়ে চিনাক্ত কৰিব নোৱাৰে। আৰু ইয়াৰ সুৰুঙাৰে সোণমে কেইবাদিনো নিজকে লুকাই ৰাখিবলৈ সময় পাই যাব।

তদন্তকাৰীয়ে দাবী কৰিছে যে ধৃত ব্যক্তিসকলে জেৰাৰ সময়ত কয় যে তেওঁলোকে পূৰ্বে সিদ্ধান্ত লৈছিল যে কামাখ্যা মন্দিৰত সোণম পূজা দিয়াৰ পিছত ৰাজাক গুৱাহাটীতে হত্যা কৰা হ’ব। কিন্তু কিবা কাৰণত সেয়া বিফল হয়।

ইয়াৰ পিছত সোণমে শ্বিলং আৰু চোহৰালৈ যোৱাৰ পৰিকল্পনা কৰিলে। ২৩ মে’ত নাংৰিহাটত সোণম আৰু তিনি দুৰ্বৃত্তই লগ হৈ তাতেই ৰাজাক হত্যা কৰাৰ পৰিকল্পনা ৰচনা কৰে। তেওঁলোকে ৱেইছডং জলপ্ৰপাতৰ ফালে আগবাঢ়ি গৈ থাকে।

আৰক্ষী অধীক্ষকে জনোৱা মতে, সোণম আৰু তিনি দুৰ্বৃত্তক পৃথকে পৃথকে জেৰা কৰে। তেওঁলোকে দিয়া হত্যাকাণ্ডৰ সময় জানি অনুমান কৰা হৈছে যে ২৩ মে’ৰ দুপৰীয়া ২ বজাৰ পৰা ২ বাজি ১৮মিনিটৰ ভিতৰত ৰাজাক হত্যা কৰা হৈছিল।ইয়াৰ পিছত ৰাজাৰ মৃতদেহটো খাৱৈত পেলাই দিয়া হৈছিল।

আৰক্ষী অধীক্ষকে জনোৱা মতে, সোণমে পিন্ধা ৰেইনকোটটো আকাশক দি দিছিল। কাৰণ, আকাশৰ কাপোৰত ৰাজাৰ তেজৰ দাগ আছিল। চাৰিওজনে স্কুটিত উঠি ৱেইছডং এৰি গুচি যায়। আকাশে মাজ ৰাস্তাত সোণমে দিয়া ৰেইনকোটটো খুলি পেলাই দিয়ে। ভাড়াতীয়া স্কুটিখন ৰাস্তাতে এৰি থৈ যায়।

তদন্তকাৰীৰ জেৰাৰ সময়ত দুৰ্বৃত্ত আৰু সোণমে জনায় যে ৰাজে ইতিমধ্যে বিশালক এটা বোৰ্খা দিছিল। সোণমে প্ৰথমে সেই বোৰ্খা পিন্ধি পুলিচ বজাৰ এলেকালৈ গৈছিল।

তাৰ পৰাই সোণম টেক্সিত উঠি গুৱাহাটীলৈ গৈ বাছেৰে শিলিগুৰি পায়গৈ। শিলিগুৰিৰ পৰা সোণম বাছত উঠি পাটনালৈ যায়। পাটনাৰ পৰা বাছেৰে আৰা পায়হি। আৰাৰ পৰা ৰেলত উঠি তাই লক্ষ্ণৌলৈ যায়। লক্ষ্ণৌৰ পৰা বাছেৰে ইন্দোৰত উপস্থিত হয়।

সোণম ইন্দোৰলৈ উভতি যোৱাৰ আগতে সাধাৰণ পোছাকত মেঘালয় আৰক্ষীৰ তদন্তকাৰীৰ দুটা দল উত্তৰ প্ৰদেশ আৰু মধ্যপ্ৰদেশত উপস্থিত হৈছিল। প্ৰথমে আৰক্ষীয়ে আকাশক গ্ৰেপ্তাৰ কৰে। আকাশক গ্ৰেপ্তাৰ কৰা বুলি জানিয়েই ৰাজ হতভম্ব হৈ পৰে।

ৰাজে সোণমক কয় যে তাই য’তেই নাথাকক কিয় তাৰ ঘৰলৈ ফোন কৰি ক’ব লাগে যে তাই মাত্ৰ তাইৰ অপহৰণকাৰীৰ হাতৰ পৰা মুকলি হৈছে। প্ৰেমিক ৰাজৰ পৰামৰ্শ মতে গাজীপুৰলৈ গৈ আৰক্ষীৰ ওচৰত আত্মসমৰ্পণ কৰে।

শিলচৰ আদালতৰ নিৰ্দেশ অনুসৰি হত্যাকাণ্ডৰ অভিযুক্ত সোণমকে ধৰি ৫জন  বুধবাৰৰ পৰা ৮ দিন ধৰি আৰক্ষীৰ জিম্মাত আছে। বৃহস্পতিবাৰে পাঁচজনক পৃথকে পৃথকে জেৰা কৰা হয়।