ৱাটছ্এপত ‘বিকশিত ভাৰত’ বাৰ্তা প্ৰেৰণ বন্ধ কৰিবলৈ কেন্দ্ৰক নিৰ্দেশ নিৰ্বাচন আয়োগৰ
লোকসভা নিৰ্বাচনলৈ মাজত আৰু মাথো কেইটামান দিন। ইতিমধ্যে নিৰ্বাচন আয়োগে নিৰ্বাচনৰ দিন ঘোষণা কৰিছে। সেই অনুসাৰে সম্প্ৰতি বলবৎ হৈ আছে মডেল ক’ড অৱ কণ্ডাক্ট (MCC)।
নিৰ্বাচনৰ প্ৰাকমুহূৰ্তত বৰ্তমানৰ শাসকীয় বিজেপি নেতৃত্বাধীন কেন্দ্ৰীয় চৰকাৰে ভাৱমূৰ্তি উজ্জল কৰি তুলিবলৈ চৰকাৰৰ বিগত কাৰ্যকালৰ পদক্ষেপসমূহৰ সন্দৰ্ভত দেশবাসীলৈ ৱাট্ছ্এপ যোগে প্ৰেৰণ কৰিছে ‘বিকশিত ভাৰত’ বাৰ্তা।
মডেল ক’ড অৱ কণ্ডাক্ট বলৱৎ হোৱাৰ পিছতো চৰকাৰে এইদৰে বাৰ্তা প্ৰেৰণ কৰা কাৰ্য তাৎক্ষণিকভাৱে বন্ধ কৰিবলৈ কেন্দ্ৰীয় ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ক নিৰ্দেশ দিছে ভাৰতীয় নিৰ্বাচন আয়োগে।
নিৰ্বাচন আয়োগে লগতে এই সন্দৰ্ভত মন্ত্ৰালয়ক প্ৰতিবেদন দাখিল কৰিবলৈও নিৰ্দেশ দিছে। আয়োগে কয় যে নিৰ্বাচনৰ দিন ঘোষণা আৰু এমচিচি বলবৎ হোৱাৰ পিছতো বাৰ্তাসমূহ এতিয়াও নাগৰিকৰ ফোনলৈ প্ৰেৰণ কৰা হৈছে।
ইয়াৰ উত্তৰত কেন্দ্ৰীয় ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ে এমচিচি বলবৎ হোৱাৰ আগতেই বাৰ্তাসমূহ প্ৰেৰণ কৰা হৈছিল বুলি নিৰ্বাচন আয়োগক জনায়।
তথাপিও ইয়াৰে কিছুমান সম্ভৱতঃ ব্যৱস্থাগত আৰু নেটৱৰ্কৰ সীমাবদ্ধতাৰ বাবে পলমকৈ প্ৰাপকসকলে মোবাইলত লাভ কৰা বুলি মন্ত্ৰালয়ে আয়োগৰ সমুখত উল্লেখ কৰে।
উল্লেখ্য যে যোৱা ১৬ মাৰ্চত নিৰ্বাচন আয়োগে নিৰ্বাচনৰ সময়সূচী ঘোষণা কৰিছিল। আয়োগৰ ঘোষণা অনুসৰি ১৯ এপ্ৰিলৰ পৰা ১ জুনলৈকে সাতটা পৰ্যায়ত নিৰ্বাচন অনুষ্ঠিত হ’ব আৰু ৪ জুনত ফলাফল ঘোষণা কৰা হ’ব।